اقش پرەزيدەنتى دجو بايدەن تاليبان باسشىسىمەن كەزدەسۋ ءۇشىن ەلدىڭ ەڭ جوعارعى تىڭشىسىن جىبەردى. "بۇل تالىپتەر اۋعانستان استاناسىن باسىپ العاننان بەرگى ەڭ جوعارى دەڭگەيدەگى ديپلوماتيالىق كەزدەسۋ بولدى" دەپ حابارلادى ۆاشينگتون پوست باسىلىمى.
باسىلىم ءاتى-جونىن ايتپاۋدى وتىنگەن اقش شەنەۋنىگىنە سىلتەمە جاساي وتىرىپ، اقش ورتالىق بارلاۋ باسقارماسىنىڭ ديرەكتورى ۋيليام بەرنس دۇيسەنبىدە كابۋلدا تاليبان ليدەرى ابدۋل گاني بارادارمەن كەزدەسكەنىن حابارلادى. بايدەن اكىمشىلىگى كابۋل اۋەجايىنداعى بەيبەرەكەتسىزدىك جاعدايىندا اقش ازاماتتارى مەن باسقا وداقتاستارىن ەۆاكۋاسيالاۋدى جالعاستىرۋدا.
ال، رەيتەرس اگنتتىگى بۇل حاباردى بىردەن تەكسەرە الماي وتىرعانىن جازادى. "اقش ورتالىق بارلاۋ باسقارماسى مەن اق ءۇيدىڭ وكىلدەرى تۇسىنىكتەمە بەرۋ سۇراۋىنا بىردەن جاۋاپ بەرمەدى" دەيدى اگەنتتىك.
رەيتەرس 31 تامىزدا ەۆاكۋاسيالاۋ مەرزىمى اياقتالسا، G7 ەلدەرى مەن تاليبان "سوعىس جاعدايىندا" كەلىسسوز جۇرگىزۋى ىقتيمال ەكەنىن ايتادى.
بۇعان دەيىن تاليبان قوزعالىسىنىڭ وكىلى ەۆاكۋاسيالاۋ مەرزىمىن ۇزارتۋعا قارسى ەكەنىن جاريالاپ، ونىڭ "اۋىر سالدارى" بولاتىنىن ايتقان. الايدا اقش پرەزيدەنتى دجو بايدەن ەۆاكۋاسيا مەرزىمىن ۇزارتاتىن شەشىم شىعارادى دەپ كۇتىلۋدە.
پىكىر قالدىرۋ