اۋعانستاننىڭ جەر قويناۋى تابيعي رەسۋرستارعا، التىن مەن اسىل تاستار، مىس پەن ليتييگە باي. ەلدەگى بيلىك اۋىسقاننان كەيىن قۇنى 1 تريلليون دوللاردان اساتىن بايلىققا كىم يە بولادى دەگەن ساۋال كوپشىلىكتى قىزىقتىرادى.

ءبي-بي-سيدىڭ ورىس قىزمەتى جازعانىنداي، عاسىرلار بويعى سوعىستاردان زارداپ شەككەن ەلدەگى رەجيمنىڭ وزگەرۋىنەن كەيىن تابيعي بايلىقتى، ادامي كاپيتالدى جانە ۇلى جىبەك جولىنىڭ ورتالىعىن كىم باسقاراتىنى بەلگىسىز بولىپ تۇر.

كەزىندە كەڭەس جانە امەريكالىق گەولوگتار اۋعانستاننىڭ تاۋلارى مەن شاتقالدارىندا كوكنار ەكپەلەرى مەن ونداعان ميلليون توننا مىس پەن بوكسيت، ميللياردتاعان توننا تەمىر رۋداسى، سونداي-اق التىن، ءمارمار جانە باسقا دا قۇندى قازبالار بار ەكەنىن مالىمدەگەن.

الايدا وسى ۋاقىتقا دەيىن اۋعانستان مۇنىڭ ءبارىن قازىپ، ساتا المادى. ال تۇسكەن اقشانى حالىقتىڭ ءومىر ءسۇرۋ دەڭگەيىن ارتتىرۋعا، مەديسيناعا، ءبىلىم مەن عىلىمعا جۇمساۋعا قاۋقارسىز بولدى.

ەل ۇكىمەتى ءبۇعان دەيىن ءۇندى، بريتانيالىق، كانادالىق جانە قىتايلىق ينۆەستورلارمەن كەلىسىمگە قول قويعان. الايدا ەلدەگى جەمقورلىققا بالانىستى، ءالى دە تاۋ-كەن جۇمىستارى باستالماعان. 

بيزنەسكە جارامدى ەلدەر رەيتينگىندە دۇنيەجۇزىلىك بانك اۋعانستاندى 190 ەلدىڭ ىشىندە 173ء-شى ورىنعا جايعاستىرعان. ال جەمقور مەملەكەتتەر رەيتينگىندە ول 180 ەلدىڭ 165ء-ىنشىسى بولىپ تۇر.

جەكە بيزنەستىڭ دامۋىنا ەلدەگى قاۋىپسىزدىكتىڭ تومەن احۋالى مەن ساياسي تۇراقسىزدىق، مەملەكەتتىك ينستيتۋتتاردىڭ ءالسىز بولۋى، ينفراقۇرىلىمنىڭ جەتكىلىكسىزدىگى تۇساۋ بولىپ وتىر. ءوندىرىستىڭ، ەكسپورتتىڭ ۇلەسى كولەڭكەلى ەكونوميكاعا، ەسىرتكى، كونتراباندا جانە پايدالى قازبالاردى زاڭسىز وندىرۋگە تيەسىلى.

"امەريكالىقتاردىڭ كەتۋى جانە تالىپتەردىڭ اۋعانستانداعى بيلىككە ورالۋىمەن بۇل پروبلەمالار شەشىلمەيدى. ينۆەستورلار جەمقور شەنەۋنىكتەرمەن جۇمىس ىستەي الادى. ال كوپتەگەن ەلدەردە تەرروريستىك ۇيىممەن جۇمىس ىستەۋ قيىنىراق" دەلىنگەن بي-بي-سي ماتەريالىندا.