پرەزيدەنت قاسىم-جومارت توقايەۆ قورعانىس ءمينيسترى نۇرلان ەرمەكبايەۆتىڭ وتستاۆكاسىن قابىلدادى.

"مەملەكەت باسشىسى قاسىم-جومارت توقايەۆ قورعانىس ءمينيسترى نۇرلان ەرمەكبايەۆتىڭ قىزمەتتەن بوساتۋ جونىندەگى راپورتىن قاراستىرىپ، ونىڭ ءوتىنىشىن قابىلدادى" دەپ جازدى پرەزيدەنتتىڭ باسپا ءسوز حاتشىسى بەرىك ءۋالي facebook پاراقشاسىندا.

بۇعان دەيىن نۇرلان ەرمەكبايەۆ جامبىل وبلىسىنداعى جارىلىس بولعانىن ەستىگەن العاشقى ساتتە وتستاۆكاعا كەتۋ تۋرالى ويلاعانىن، وتستاۆكا تۋرالى ارىز جازاتىنىن، شەشىمدى باسشىلىق قابىلدايتىنىن مالىمدەگەن.

26 تامىز كۇنى جامبىل وبلىسى بايزاق اۋدانىندا ورنالاسقان اسكەري بولىمدە ساعات 19.00 شاماسىندا قويمالاردىڭ ءبىرىنىڭ جانىندا ءورت شىققان. ءورت سالدارىنان قويماداعى ءوق-دارى جارىلىپ، سالدارىنان 15 ادام قازا تاپقان. ولاردىڭ اراسىندا ءورت سوندىرۋشىلەر، توتەنشە جاعداي مينيسترلىگىنىڭ، اسكەري ءبولىمنىڭ، اسكەري كۇزەت پەن اسكەري پروكۋراتۋرانىڭ قىزمەتكەرلەرى بار. اسكەري بولىمنەن جارتى شاقىرىم جەردەگى قاينار اۋىلىنداعى ۇيلەر بۇلىنگەن.

جارىلىستان قازا تاپقانداردىڭ تولىق ءاتى-جونى تومەندەگىدەي:

ەفرەيتور ر.س.جانبولاتوۆ – 40 جاستا

سەرجانت م.س.مەرشىمباي – 40 جاستا

ستارشينا ە.ە.نادىربەكوۆ – 41 جاستا

ازاماتتىق قىزمەتكەر و.د.دالىبايەۆ – 59 جاستا

وڭتۇستىك ءوڭىردىڭ اسكەري پروكۋرورى ا.ق.قاپەزوۆ – 44 جاستا

سەرجانت-ورت ءسوندىرۋشى ا.س.تەمىربولاتوۆ – 28 جاستا

پولكوۆنيك م.ك.ايمانوۆ – 45 جاستا

پودپولكوۆنيك ا.ن.ميكروپۋلو – 50 جاستا

سەرجانت، اعا ءورت قۇتقارۋشىسى ە.ق.ساندىبايەۆ – 30 جاستا

سەرجانت، اعا ءورت قۇتقارۋشىسى ت.ق.تورەبەكوۆ – 40 جاستا

مايور س.ج.الىمبەكوۆ – 36 جاستا

مايور، قاراۋىل باسشىسى س.ۆ.زايكين – 41 جاستا

اعا سەرجانت، جۇرگىزۋشى گ.ج.قۋاتبەك – 26 جاستا

كىشى سەرجانت، ءورت قۇتقارۋشىسى ءا.ق.ادىلبەك – 25 جاستا

قاتارداعى ءورت ءسوندىرۋشى ءا.ب.كەڭەس – 22 جاستا