"تاليبان" سودىرلارى اۋعانستان استاناسى كابۋلداعى نارازىلىق اكسيالارىن حابارلاعانى ءۇشىن جۋرناليستەردى ۇرىپ-سوعىپ، قاماۋعا الدى. بۇل تۋرالى Aljazeera اقپارت اگەنتتىگى مالىمدەدى.

"Etilaat Roz" گازەتىنىڭ جۋرناليستەرى تاكي داريابي مەن نەماتۋللا ناقدي سارسەنبى كۇنى تاڭەرتەڭ كابۋلدىڭ باتىسىندا ايەلدەر نارازىلىعىن جاريالاۋ كەزىندە تالىپتەرگە ۇستالعان.

قاماۋعا الىنعان جۋرناليستەردىڭ ارىپتەستەرى ابەر شايگان مەن لۋتفالي سۋلتاني ارىپتەستەرىنىڭ قايدا ەكەنىن سۇراۋ ءۇشىن گازەت رەداكتورى كادحيم كاريميمەن بىرگە پوليسيا بولىمىنە بارعان. ولار پوليسيا بولىمشەسىنە جەتكەن ساتتە "تاليبان" سودىرلارى ارىپتەستەرىن يتەرىپ، ۇرىپ-سوعىپ، بارلىق زاتتارىن، سونىڭ ىشىندە ۇيالى تەلەفوندارىن تارتىپ العانىن بىلگەن.

اۋعانستاندا حابار تاراتاتىن "Etilaat Roz" كومپانياسىنىڭ نەگىزىن قالاۋشى جانە باس رەداكتورى زاكي داريابي جاراقات العان ەكى ارىپتەسىنىڭ سۋرەتتەرىن جاريالادى.

ول بولىسكەن سۋرەتتە جۋرناليستەردىڭ ارقا، اياق، يىق جانە قولدارىندا جاراقات ىزدەرى بايقالادى.

زاكي داريابي بۇل وقيعانى بۇكىل اۋعانستانداعى تاۋەلسىز ب ا ق قۇرالدارىنا ارنالعان ەسكەرتۋ ەكەنىن اتاپ ءوتتى.

– تالىپتەر ءبىزدىڭ ارىپتەستەرىمىزدى 4 ساعاتتان استام ۋاقىت تەرگەۋ يزولياتورىندا ۇستادى. وسى 4 ساعات ىشىندە ولاردى اياۋسىز ۇرىپ-سوعىپ، ازاپتادى، – دەدى ول.