الەۋمەتتىك جەلىدە ماڭعىستاۋدا اتوم ەلەكتر ستانسياسىن سالۋ جوسپارلانىپ وتىر دەگەن اقپارات تاراپ جاتىر. بۇل اقپاراتتى وڭىرلىك قوعامدىق كوممۋنيكاسيا ورتالىعىندا وبلىس اكىمىنىڭ باسپا ءسوز حاتشىسى جوققا شىعاردى.
– پرەزيدەنت ءوزىنىڭ جولداۋى بارىسىندا ۇكىمەتكە جانە "سامۇرىق-قازىنا" قورىنا بەيبىت اتومدى پايدالانۋ مۇمكىندىگىن قاراستىرۋدى تاپسىردى. قازىرگى ۋاقىتتا ۋاكىلەتتى ورگاندار وسى تاپسىرمانى پىسىقتاۋدا. سونىمەن قاتار، ماڭعىستاۋ وبلىسىندا اتوم ەلەكتر ستانسياسىن سالۋ ماسەلەسى قاراستىرىلماعانىن اتاپ وتكەن ءجون، – دەدى ماڭعىستاۋ وبلىسى اكىمىنىڭ باسپا ءسوز حاتشىسى گۇلميرا ابىشيەۆا.
پرەزيدەنت بيىلعى جولداۋىندا قازاقستاندا 2030 جىلعا قاراي ەلەكتر قۋاتىنىڭ تاپشىلىعى پايدا بولاتىنىن، الەمدىك تاجىريبە بويىنشا مۇنىڭ ەڭ وڭتايلى شەشىمى بەيبىت اتوم ەكەنىن ايتقان.
