I توپتاعى مۇگەدەكتىگى بار ادامدارعا كۇتىم كورسەتۋشىلەرگە جاڭا جاردەماقى ءتۇرى ەنگىزىلەدى. بۇل تۋرالى سەناتتىڭ جالپى وتىرىسىنىڭ ءبىرىنشى وقىلىمىندا  ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ مالىمدەدى.

ءمينيستردىڭ ايتۋىنشا، قۇجاتتا مۇگەدەكتىكتىڭ سەبەبىنە قاراماستان I توپتاعى مۇگەدەكتىگى بار ادامدارعا كۇتىم جاسايتىن ازاماتتارعا بەرىلەتىن جاردەماقىنى ەنگىزۋ قاراستىرىلعان.

– قازىرگى ۋاقىتتا I توپتاعى مۇگەدەكتىگى بار 66 مىڭ ادامنىڭ ءاربىر ءۇشىنشىسى كۇتىم جاردەماقىسىمەن دە، جەكە كومەكشىنىڭ قىزمەتتەرىمەن دە قامتاماسىز ەتىلمەگەن. زاڭ جوباسىن قابىلداۋ ناتيجەسىندە سىرتقى قامقورلىققا مۇقتاج 24 مىڭ ادام كۇتىم بويىنشا جاردەماقىمەن قوسىمشا قامتىلادى، – دەدى ول. 

سونداي-اق  مۇگەدەكتىگى بار بالالاردىڭ بارلىق توپتارى ءۇشىن جاردەماقى مولشەرى 16،7%-دان 37%-عا دەيىن ۇلعايتىلادى. بۇل  30 مىڭنان استام مۇگەدەكتىگى بار بالاعا قاتىستى.

– قازىرگى ۋاقىتتا مۇگەدەكتىگى بار بالالار اتا-انالارى اجىراسقان كەزدە ءبىر مەزگىلدە اليمەنتتەر مەن مۇگەدەكتىگى بويىنشا جاردەماقى الا الادى. وسى نورما ەنگىزىلگەن جاعدايدا 2 مىڭ بالا مۇگەدەكتىگى بويىنشا جاردەماقىمەن قاتار (مولشەرى 41 163 تەن 48 023 تەڭگەگە دەيىن) اسىراۋشىسىنان ايىرىلعان جاعدايدا جاردەماقى الادى (مولشەرى 12 063-تەن 29 500 تەڭگەگە دەيىن)، –  دەپ ءتۇسىندىردى سەرىك شاپكەنوۆ.

سونىمەن قاتار، مينيستر مۇگەدەكتىگى بار بالالاردى تاربيەلەپ وتىرعان وتباسىلاردىڭ بالالارى كامەلەتكە تولعاننان كەيىن تۇرعىن ءۇي كەزەگىندە 10 جىلعا دەيىن تۇراتىنىن اتاپ ءوتتى.

ەگەر بالانىڭ 18 جاسقا تولعانعا دەيىن باسپاناسى بولماسا، وندا مۇگەدەكتىگى بار ازامات كەزەككە قايتا تۇرۋعا ءماجبۇر. بۇل نورما 20 مىڭنان استام وتباسىنا تۇرعىن ءۇي كەزەگىن ساقتاۋعا مۇمكىندىك بەرەدى. 

بۇل زاڭ جوباسى 55 ملرد تەڭگە سوماسىنا قاجەتتى قارجىلاندىرۋمەن قامتاماسىز ەتىلدى. شىعىن نورمالارى 2021-2023 جىلدارعا بولىنگەن قاراجات شەڭبەرىندە ىسكە اسىرىلادى.