سوڭعى 20 جىلدا اۋعانستاندا ب ا ق سالاسى بەلسەندى تۇردە دامىدى. تاليبان بيلىك باسىنا كەلگەننەن كەيىن، ب ا ق وكىلدەرى قاۋىپكە، ءتىپتى ءولىم قاتەرىنە ۇشىرادى. حالىقارالىق بەلسەندىلەر جەدەل تۇردە ولارعا كومەك بەرۋگە شاقىرادى. بۇل تۋرالى گەرمانيانىڭ DW باسىلىمى حابارلادى.

نەمىس ءباسپاسوزىنىڭ مالىمەتىنشە، حالىقارالىق شەكاراسىز تىلشىلەر ۇيىمى وسى سارسەنبىدە بەرليندەگى شتاب-پاتەرىندە جاسىرىن باسپا ءسوز كونفەرەنسياسىن وتكىزگەن. پاندەمياعا بايلانىستى وعان 20 جۋرناليستكە عانا قاتىسۋعا رۇقسات ەتىلگەن.

اقپاراتقا سايكەس، كونفەرەنسيادان تىكەلەي بەينەتاراتۋ ۇيىمداستىرىلماعان ويتكەنى بولمەدەگى اۋعانستاننان كەلگەن جۋرناليستەر ءوز ومىرىنە نەمەسە اۋعانستانداعى دوستارى مەن تۋىستارىنىڭ ومىرىنە الاڭداۋشىلىق بىلدىرگەن. 

كابۋلداعى ءىرى گازەتتە جانە اۋعانستاننىڭ ەكىنشى ءىرى قالاسى گەراتتا جۇمىس ىستەگەن جۋرناليستەر كونفەرەنسياعا بايلانىستى گەرمانيادا 10 كۇن بولعان. جۋرناليستەر راديكالدى يسلامشىل تاليبان ۇيىمى بيلىك باسىنا كەلگەلى بىرنەشە ارىپتەسىن قورقىتىپ، جۇمىس ىستەۋىنە كەدەرگى كەلتىرگەنىن ايتىپ بەرگەن. ولاردىڭ اقپاراتىنشا، كوپتەگەن ارىپتەستەرى ءقازىر ۇيدە جاسىرىنىپ جاتىر نەمەسە اۋعانستانمەن كورشىلەس ەلدەرگە قاشىپ كەتكەن. "تاليباندار حالىقارالىق دەڭگەيدە تانىلۋ ءۇشىن تولەرانتتى بولىپ كورىنەدى، ءبىراق جاپپاي شابۋىلداردىڭ سانسىز مىسالدارى بار" دەيدى ولار DW-گە.