سوڭعى ۋاقىتتا ءتىل ماسەلەسى قوعامدا قىزۋ تالقىعا ءتۇسىپ جاتىر. جۋىردا "ءتىل مايدانى" قوزعالىسى بەلسەندىلەرىنىڭ قازاقشا قىزمەت كورسەتۋدى تالاپ ەتكەن ارەكەتتەرىنە بايلانىستى رەسەيدىڭ ءبىرقاتار باسپا ءسوز قۇرالدارى "قازاقستاندا ورىس تىلىنە قىسىم جاسالىپ وتىر" دەپ اقپارات تاراتتى.
ۇزاماي پرەزيدەنت اكىمشىلىگى ءتوراعاسىنىڭ ءبىرىنشى ورىنباسارى داۋرەن ابايەۆ بەلسەندىلەردىڭ ارەكەتىن "ۇڭگىر ءپاتريوتيزمى" دەپ اتادى. كەي ساياساتتانۋشىلار ابايەۆ مالىمدەمەسىن ماسكەۋ بيلىگىنە مۇنداي ارەكەتتەر قازاقستان بيلىگى تاراپىنان ۇيىمداستىرىلىپ وتىرماعانىن ۇعىندىرۋعا تىرىسقانىمەن تۇسىندىرەدى.
ارتىنشا ءتىل مايدانى قوزعالىسىنىڭ جەتەكشىسى قۋات احمەتوۆتىڭ ۇستىنەن باس پروكۋراتۋرا قىلمىستىق كودەكستىڭ 174-بابى (الەۋمەتتiك، ۇلتتىق، رۋلىق، ءناسiلدiك، تەكتىك-توپتىق نەمەسە دiني الاۋىزدىقتى قوزدىرۋ) بويىنشا قىلمىستىق ءىس قوزعاپ، بەلسەندى بىرەر كۇن بۇرىن قازاقستاننان كەتۋگە ءماجبۇر بولعان.
سونداي-اق قازاقستاندا جاڭا وقۋ جىلى قارساڭىندا قازاق اتا-انالار بالاسىن ورىس سىنىبىنا، ورىسشا ءبىلىم بەرەتىن مەكتەپكە بەرىپ جاتقانى تۋرالى اڭگىمەلەر الەۋمەتتىك جەلىدە جيىلەگەن. اڭگىمەنى ستاتيستيكالىق دەرەكتەر دە راستاعان. سوڭعى 5 جىلدا قازاق مەكتەپتەرىندە وقيتىن بالا سانى 18 پايىزعا، ورىس مەكتەپتەرىندە وقيتىن بالا سانى 20 پايىزعا ارتقان.
بىرنەشە ساراپشى مۇنىڭ سەبەبىن "بيلىك باسىنداعىلار قازاق ءتىلىن تالاپ ەتۋشىلەرگە دەگەن كوزقاراسىن "ۇڭگىردەگى ۇلتشىلدار" دەپ اشىق ءبىلدىرىپ وتىرعان كەزدە، جۇرت قازاق ءتىلىنىڭ بولاشاعىنا سەنبەيتىنىمەن بايلانىستىرادى.
پرەزيدەنت ق.توقايەۆ 1 قىركۇيەك كۇنى قازاقستان حالقىنا ارناعان بيىلعى جولداۋى بارىسىندا "ورىس ءتىلى قازاقستانداعى رەسمي ءتىل" دەگەندى ايتتى. ەلدەگى باستى زاڭ – كونستيتۋسيا بويىنشا ورىس تىلىندە مۇنداي ستاتۋس جوق. بەلگىلى زاڭگەر، ءتىل ماسەلەسى بويىنشا كوپتەگەن ىستەرگە قاتىسقان قۇقىققورعاۋشى ابزال قۇسپان پرەزيدەنت مالىمدەمەسى قازاقستاندا قۇقىقتىق نيگيليزمنىڭ اسقىنىپ تۇرعانىن بىلدىرەتىنىن ايتادى.
پىكىر قالدىرۋ