گرۋزيانىڭ ەكس-پرەزيدەنتى ميحايل سااكاشۆيلي ۇستالىپ، قاماۋعا الىندى. بۇل تۋرالى گرۋزيانىڭ پرەمەر-مينيسترى يراكليي گاريباشۆيلي حابارلادى.
يراكليي گاريباشۆيلي سااكاشۆيليدىڭ ەلدىڭ ناقتى قاي اۋماعىندا ۇستالعانىن ايتپادى. پرەمەر تەك قۇزىرلى ورگان وكىلدەرى ەكس-پرەزيدەنتتى تۇتقىنداۋ وپەراسياسىن جوعارى دەڭگەيدە جۇرگىزگەنىن اتاپ ءوتتى.
– ءبىزدىڭ قۇزىرلى ورگان وكىلدەرىندە ونىڭ ۋكراينادان باستاپ گرۋزياعا دەيىنگى ساپارى جايىندا الدىن-الا مالىمەت بولدى، – دەيدى يراكليي گاريباشۆيلي.
ايتا كەتەيىك، بۇعان دەيىن سااكاشۆيلي ۆيدەوۇندەۋ جاساپ، ءوزىنىڭ باتۋميدە ەكەنىن ايتقان بولاتىن. الايدا گرۋزيانىڭ ىشكى ىستەر مينيسترلىگى بۇرىنعى پرەزيدەنتتىڭ شەكارانى كەسىپ وتپەگەنىن ايتىپ، بۇل اقپاراتتى جوققا شىعاردى. ودان بولەك، ۆەدومستۆو سااكاشۆيليگە ىزدەۋ جاريالانعانىن، ەگەر ول گرۋزياعا كەلسە، بىردەن تۇتقىندالاتىنىن ايتتى.
ەستەرىڭىزگە سالا كەتسەك، ميحايل سااكاشۆيلي 2004-2013 جىلدار ارالىعىندا گرۋزيا پرەزيدەنتى بولدى. كەيىن ەلدەن قاشىپ كەتتى. وعان قاتىستى بىرنەشە قىلمىستىق ءىس قوزعالعان جانە سوت سىرتتاي ۇكىم كەسكەن. سااكاشۆيلي وزىنە تاعىلعان ايىپتىڭ ساياسي استارى بار دەپ سانايدى.
پىكىر قالدىرۋ