الماتىداعى سوت ورىنداۋشىسىن سوققىعا جىققان ماقسوت ىسقاقوۆ سوتقا ارىز جازعانى حابارلاندى . 

ماقسوت ىسقاقوۆ اكىمشىلىك سوتقا جەكە سوت ورىنداۋشىسىنىڭ ارەكەتىن زاڭسىز دەپ تانۋ تۋرالى تالاپ ارىز بەرگەن. قالالىق سوتتىڭ باسپا ءسوز قىزمەتى ءىستى الدىن-الا تىڭداۋ 5 قاراشاعا بەلگىلەنگەنىن حابارلادى.

بۇعان دەيىن، 4 قازان كۇنى الماتىدا جەكە سوت ورىنداۋشىسى ءادىل ەرمەكوۆ قىزمەت بارىسىندا سوققىعا جىعىلعان. ونى سوت شەشىمىمەن كەلىسپەگەن الماتىلىق تۇرعىن ماقسوت ىسقاقوۆ باۋىر تۇسىنان سوققان.

جانجالعا كاسىپقوي بوكسشى جانقوش تۇراروۆتىڭ قاتىسى بار دەگەن اقپارات شىققان. كەيىن سپورتشى وقيعا ورنىندا بولعانىن، الايدا ەشكىمدى ۇرماعانىن جەتكىزگەن. 

ارتىنشا جانجال كەزىندە زارداپ شەككەن سوت ورىنداۋشىسى ۆيدەوۇندەۋ جاريالاپ، وزىنە شابۋىل جاساعان ادامدى قاماتقىسى كەلەتىنىن ايتقان.

ال ماقسوت ىسقاقوۆ ءوز كەزەگىندە پوليسياعا جەكە سوت ورىنداۋشىسى مەن ونىڭ كومەكشىلەرىنىڭ ارەكەتتەرىنە ارىز جازعانىن جانە ءوزىن كىنالى دەپ سانامايتىنىن حابارلادى.