الماتى مەتروسىنىڭ ەكى جاڭا بەكەتى ىسكە قوسىلعاندا جولاۋشىلار اعىنى كۇنىنە 86 مىڭ ادامعا دەيىن وسەتىن بولادى بۇل تۋرالى الماتى اكىمى باقىتجان ساعىنتايەۆ مەتروپوليتەننىڭ ەكىنشى ىسكە قوسۋ كەشەنى نىساندارىنىڭ قۇرىلىس بارىسىمەن تانىسۋ بارىسىندا ءمالىم ەتتى.
قالا اكىمى باسپا ءسوز قىزمەتىنىڭ مالىمەتىنشە، ەكىنشى ىسكە قوسۋ كەشەنى ارالىق توننەلدەردەن جانە قازىرگى كەزدە ارلەۋ جۇمىستارى ءجۇرىپ جاتقان "سارىارقا" جانە "ب. مومىش ۇلى" ەكى بەكەتىنەن تۇرادى. كەشەن ۋچاسكەسىنىڭ تراسساسى اباي داڭعىلىنىڭ استىندا، التىنسارين داڭعىلىنان ياسساۋي كوشەسىنە دەيىن باتىس باعىتتا ورنالاسقان. قۇرىلىس ۇزىندىعى ەكى جولدى باعىتتا 3،08 كم قۇرايدى.
"ەكىنشى ىسكە قوسۋ كەشەنىنىڭ جالپى دايىندىعى 91%. بۇگىندە تەمىر-بەتون كونسترۋكسيالارىنىڭ قۇرىلىسى، ارالىق توننەلدەردى قازۋ اياقتالدى، ساۋلەت-ارلەۋ جۇمىستارى، جولدىڭ جوعارعى قۇرىلىسى اياقتالىپ قالدى. قالعان جۇمىستارعا ينجەنەرلىك جەلىلەردى توسەۋ جانە جابدىقتى ىسكە قوسۋ كىرەدى.
بۇگىندە ورتاشا تاۋلىكتىك جولاۋشىلار اعىنى 30 مىڭ ادامدى قۇرايدى. مامانداردىڭ ەسەپتەۋى كورسەتكەندەي، ەكىنشى ىسكە قوسۋ كەشەنى پايدالانۋعا بەرىلگەن سوڭ ورتاشا تاۋلىكتىك جولاۋشىلار اعىنى شامامەن 86 مىڭ ادامعا جەتەتىن بولادى. بۇل – اباي داڭعىلىنداعى كولىك قوزعالىسىن ەداۋىر جەڭىلدەتۋگە جانە مىڭداعان قالا تۇرعىندارى مەن قوناقتارىنىڭ موبيلدىلىگىن ارتتىرۋعا مۇمكىندىك بەرەدى" دەلىنگەن اقپاراتتىق حابارلامادا.
قوس بەكەتتى جىل سوڭىنا دەيىن پايدالانۋعا بەرۋ جوسپارلانعان. قالا اكىمى ب. ساعىنتايەۆ جىل سوڭىنا دەيىن ستانسيالاردىڭ تەحنيكالىق ىسكە قوسىلۋىن قامتاماسىز ەتۋ ءۇشىن قۇرىلىس-ارلەۋ جۇمىستارىن جوعارى قارقىنمەن جۇرگىزۋدى تاپسىرعان.
ال "قالقامان" بەكەتى تراسساسى قۇرىلىسى ءجۇرىپ جاتقان اباي داڭعىلىنىڭ استىندا، ياسساۋي شەسىنەن ءاشىموۆ كوشەسىنە دەيىن باتىس باعىتتا ورنالاسقان. جول ۇزىندىعى 2،5 شاقىرىم. قۇرىلىستى كەلەسى جىلدىڭ سوڭىنا دەيىن اياقتاۋ جوسپارلانۋدا. ەسەپتىك جولاۋشىلار اعىنى كۇنىنە شامامەن 93 مىڭ ادامدى قۇرايتىن بولادى.
