قۇرىلىس قالا ەكونوميكاسىنا سەرپىن بەرەتىن سالا. بيىلعى جىلدىڭ وزىندە قالامىزدا بارلىق قارجىلاندىرۋ كوزدەرى ەسەبىنەن 275 كوپقاباتتى تۇرعىن ءۇيدىڭ قۇرىلىسى باستالدى.

قالا تاريحىندا ءبىرىنشى رەت پايدالانۋعا بەرىلەتىن تۇرعىن ۇيلەردىڭ جالپى الاڭى 1 ملن شارشى مەتردى قۇرايتىن بولادى. ونىڭ ىشىندە 109 كوپقاباتتى تۇرعىن ءۇيدىڭ قۇرىلىسى اياقتالىپ، بارلىعى 6708 پاتەر پايدالانۋعا بەرىلەدى.

سالاعا باعىتتالعان قارجىنىڭ 44 پايىزىن نەمەسە 48،7 ملرد تەڭگەسىن جەكە ينۆەستيسيا قۇرايدى. «Shymkent» اكك» جشس-گى ارقىلى 18 تۇرعىن ءۇيدىڭ قۇرىلىسى جۇرگىزىلسە، جەكە قۇرىلىس كومپانيالارى تاراپىنان 58 تۇرعىن ءۇي كەشەندەرى سالىنۋدا.

بيۋدجەت ەسەبىنەن 4832 پاتەرلى 79 كوپقاباتتى تۇرعىن ءۇيدىڭ قۇرىلىسى باستالدى. ونىڭ ىشىندە 22 – ارەندالىق، 57 – كرەديتتىك ۇيلەردىڭ قۇرىلىستارى ىسكە اسىرىلۋدا.
جىل سوڭىنا دەيىن 2432 پاتەرلى 39 تۇرعىن ءۇيدىڭ قۇرىلىسى اياقتالادى. ارەندالىق 6 ءۇي مەن كرەديتتىك 33 ءۇيدىڭ جالپى الاڭى 141 مىڭ شارشى مەتردى قۇرايدى.

قازىرگى تاڭدا 46 مىڭنان استام ازامات تۇرعىن ءۇي كەزەگىنە الىنعان. جەڭىلدەتىلگەن نەسيەلىك شارتپەن 2096 پاتەر بەرۋ جوسپارلانسا، جۇمىس ىستەيتىن جاستارعا، كوپبالالى انالارعا جانە حالىقتىڭ ءالسىز الەۋمەتتىك توپتارىنا جاتاتىن تۇرعىندارعا ارنالعان 1916 كوممۋنالدىق پاتەرلەر پايدالانۋعا بەرىلەدى. حالىقتىڭ از قامتىلعان ساناتتارى ءۇشىن 500 تۇرعىن ءۇي سەرتيفيكاتى بەرىلەدى.