شىمكەنت قالاسىندا وقمۋ جانە م.ح.دۋلاتي اتىنداعى №8 مامانداندىرىلعان مەكتەپ جانىنان دەمەۋشىلەر ەسەبىنەن ەكى «اقىلدى» ايالداما پايدالانۋعا بەرىلدى.

جاڭا ايالدامادا تۇرعىنداردىڭ جولاۋشىلاردىڭ ىڭعايلىلىعى ءۇشىن تەگىن wi-fi، سمارتفون قۋاتتاعىش كوزدەرى، كونديسيونەر، قالانىڭ كارتاسى جانە مارشرۋت باعىتتارى كورسەتىلگەن ەلەكتروندى تاقتايشا، بەينەباقىلاۋ كامەرالارى ورناتىلعان.

جاڭا ايالدامانىڭ اشىلۋىنا قاتىسقان قالا اكىمىنىڭ ورىنباسارى ماقسۇت يساحوۆ مۇنداي جوبالار قالا تىرىشىلىگىنە كەرەك ەكەنىن جەتكىزدى.

–ينۆەستور سالىپ وتىرعان ءبىر ايالدامانىڭ قۇنى 8 ملن. تەڭگەنى قۇرايدى. وكىنىشكە قاراي، قالالىق بيۋدجەت ەسەبىنەن مۇنداي قارجىعا ايالدامالار سالا المايمىز، باعاسى وتە قىمبات. اقىلدى ايالدامانىڭ ەڭ ۇلكەن ارتىقشىلىعى – جازدا سالقىن، قىستا جىلى. تاعى ءبىر تيىمدىلىگى ەلەكتر جۇيەسىنىڭ شىعىندارى مەن كۇتىپ ۇستاۋ، تازالىق ماسەلەلەرى دە ينۆەستوردىڭ جاۋاپكەرشىلىگىندە بولادى،-دەدى قالا اكىمىنىڭ ورىنباسارى.

ايالدامالاردى ءقاۋىپسىز ەتۋ ءارى مۇلكىن ساقتاۋ ماقساتىندا بەينەباقىلاۋ كامەرالارى قالالىق پوليسيا دەپارتامەنتىنىڭ شۇعىل ورتالىعىنا قوسىلعان.

ايتا كەتسەك، جىل سوڭىنا دەيىن جولاۋشىلاردىڭ حابى سانالاتىن 8 نۇكتەگە سوڭعى ۇلگىدەگى اقىلدى ايالدامالار سالۋ جوسپارلانىپ وتىر.