ەلوردادا «Nur Otan» پارتياسىنىڭ قولداۋىمەن قازاقستان مۇگەدەكتەر كونفەدەراسياسى ۇيىمداستىرعان «جان شۋاق» قوعامدىق سىيلىعىنىڭ لاۋرەاتتارىن سالتاناتتى ماراپاتتاۋ ءراسىمى ءوتتى. اتالعان سىيلىق جىل سايىن قوعامدىق جۇمىستارعا بەلسەنە ارالاسقان مۇمكىندىگى شەكتەۋلى جاندارعا جانە ەرەكشە قاجەتتىلىكتەرى بار ادامداردىڭ ءومىر ءسۇرۋ ساپاسىن جاقسارتۋعا ۇلەس قوسقان ازاماتتارعا بەرىلەدى.

«Nur Otan» ءتوراعاسىنىڭ ءبىرىنشى ورىنباسارى باۋىرجان بايبەك اتاپ وتكەندەي، ەرەكشە قاجەتتىلىكتەرى بار ادامدارعا قولداۋ كورسەتۋ – ءارقاشان بيلەۋشى پارتيا جۇمىسىنداعى باسىمدىقتاردىڭ ءبىرى. بۇگىندە ەلىمىزدە ەرەكشە قاجەتتىلىكتەرى بار 700 مىڭنان استام ازامات تۇرادى، ونىڭ 14%-ى – 18 جاسقا دەيىنگى بالالار.

«ەلباسى، پارتيا ليدەرى نۇرسۇلتان نازاربايەۆتىڭ تاپسىرماسى بويىنشا وسى باعىتتاعى جۇمىستى جۇيەلەۋ ماقساتىندا ءبىز 2014 جىلى «كەدەرگىسىز كەلەشەك» پارتيالىق جوباسىن ىسكە قوستىق. جوبانىڭ ارقاسىندا ەرەكشە قاجەتتىلىكتەرى بار 40 مىڭعا جۋىق ازامات جۇمىسقا ورنالاستىرىلدى، 24 مىڭنان استام الەۋمەتتىك نىسانىندا ەرەكشە قاجەتتىلىگى بار ادامدار ءۇشىن بەيىمدەۋ جۇمىستارى جۇرگىزىلىپ، زاڭناماعا وزگەرىستەر ەنگىزىلدى، «بولاشاق» قورىنىڭ قولداۋىمەن 43 ينكليۋزيۆتى ءبىلىم بەرۋ كابينەتى اشىلدى. نۇرسۇلتان نازاربايەۆ قورى قوماقتى جۇمىس اتقارۋدا. مەملەكەت باسشىسى قاسىم-جومارت توقايەۆ پارتيانىڭ سايلاۋالدى باعدارلاماسى اياسىندا تاعى 22 مىڭ الەۋمەتتىك ينفراقۇرىلىم نىسانىن بەيىمدەۋ، ەرەكشە قاجەتتىلىكتەرى بار ادامداردى جۇمىسقا ورنالاستىرۋ باعىتىنداعى ىستەردى جالعاستىراتىن بولادى»، - دەدى باۋىرجان بايبەك.

پارتيا باسپا ءسوز قىزمەتىنىڭ اقپاراتىنا سايكەس، «Nur Otan» «بارلىق بالاعا – بىردەي مۇمكىندىك» قاعيداسىن جۇزەگە اسىرا وتىرىپ، ەلىمىزدەگى بارلىق كوللەدجدەر مەن جوعارى وقۋ ورىندارىندا، سونداي-اق مەكتەپتەر مەن مەكتەپكە دەيىنگى ۇيىمداردىڭ 70%-ىندا ينكليۋزيۆتى ءبىلىم بەرۋدى ەنگىزۋدى قامتاماسىز ەتپەك. وڭالتۋ ورتالىقتارىنىڭ سانى ۇلعايتىلىپ، ەرەكشە قاجەتتىلىكتەرى بار بالالاردى پسيحولوگيالىق-پەداگوگيكالىق جانە كوررەكسيالىق قولداۋ بويىنشا مەملەكەتتىك تاپسىرىس ەنگىزىلەدى. اسىراۋشىسىنان ايىرىلعان بالالار ءبىر مەزگىلدە مۇگەدەكتىگىنە جانە اسىراۋشىسىنان ايرىلۋىنا بايلانىستى 2 جاردەماقى الاتىن بولادى.

سونداي-اق، پارتيا زاعيپ جانە ناشار كورەتىن ازاماتتارعا ارنالعان كىتاپحانالاردى، ونىڭ ىشىندە مەملەكەتتىك تىلدەگى كىتاپتار قورىن كەڭەيتۋگە، ىمداۋ تىلىنە ونلاين اۋدارۋ ءۇشىن ارنايى باعدارلامالاردىڭ قولجەتىمدىلىگىن قامتاماسىز ەتۋگە نيەتتى. تۇراقتى كۇتىمدى قاجەت ەتەتىن جانە جەكە كومەكشىنىڭ قىزمەتىن پايدالانبايتىن مۇگەدەكتىكتىڭ ءبىرىنشى توبى بار بارلىق ازاماتتارعا قوسىمشا الەۋمەتتىك جاردەماقى بەرىلەدى. بۇل رەتتە 2025 جىلعا قاراي مۇگەدەكتىگى بار ادامدار 100% قاجەتتى تەحنيكالىق قۇرالدارمەن جانە وڭالتۋ قىزمەتتەرىمەن قامتاماسىز ەتىلەدى.

«بۇگىن سىزدەردىڭ ەڭبەكتەرىڭىز تۋرالى زور ماقتانىشپەن ايتا وتىرىپ، وزدەرىڭىزگە قۇرمەت كورسەتەمىز. سىزدەر قوعامداعى ءارقايسىمىز ءۇشىن ۇلگى بولۋعا لايىقسىزدار. ءبىزدىڭ ورتاق مىندەتىمىز – ەرەكشە قاجەتتىلىكتەرى بار ادامدار ءۇشىن جۇيەلى جاعداي جاساۋ. وزدەرىڭىز بىلەتىندەي، مەملەكەت باسشىسى ءوز جولداۋىندا پارتيانىڭ سايلاۋالدى تىزىمدەرىندە ەرەكشە قاجەتتىلىكتەرى بار ادامدار ءۇشىن ارنايى كۆوتا ەنگىزۋدى تاپسىرعان بولاتىن. ياعني، ماسەلەنى ەگجەي-تەگجەيلى بىلەتىن، ونىمەن كۇن سايىن ۇشىراسىپ، ءوز باسىنان وتكەرىپ وتىرعان ادامدار وسى باعىتتاعى ءتيىستى زاڭداردى قابىلدايدى جانە اتقارۋشى ورگانداردان وسى ماسەلەلەردى شەشۋدى تالاپ ەتەدى»، - دەپ اتاپ ءوتتى باۋىرجان بايبەك.

ءوز كەزەگىندە قازاقستان مۇگەدەكتەر كونفەدەراسياسىنىڭ پرەزيدەنتى جانات وماربەكوۆا «جان شۋاقتى» تاپسىرۋ ءراسىمى 2008 جىلدان بەرى وتكىزىلىپ كەلە جاتقانىن جانە وسى جىلدار ىشىندە سىيلىققا 70-تەن استام ادام يە بولعانىن اتاپ ءوتتى. بيىل 17 وڭىردەن 58 ادام ۇسىنىلىپ، ولاردىڭ ىشىنەن اشىق داۋىس بەرۋ ناتيجەسىندە ۇيىمداستىرۋ كوميسسيانىڭ شەشىمىمەن 7 ۇزدىك نومينانت انىقتالدى.

«بۇگىندە ەرەكشە قاجەتتىلىكتەرى بار 13 مىڭنان استام ادام – «Nur Otan» پارتياسىنىڭ مۇشەسى. بيلەۋشى پارتيامەن بىرلەسكەن جۇيەلى جۇمىستىڭ ارقاسىندا قازاقستان مۇگەدەكتەر كونفەدەراسياسى پارلامەنت ماجىلىسىندە وكىلدىك ەتەدى. اربىرىڭىزگە العىس ايتقىم كەلەدى، سەبەبى ماراپاتقا يە بولماعاندار دا قوعامنىڭ نازارىن ەرەكشە قاجەتتىلىكتەرى بار ادامداردىڭ ماسەلەسىنە اۋدارۋعا، الەۋمەتتىك كەدەرگىلەردى جويۋ ىسىنە ءوز ۇلەسىن قوستى. ءبىزدىڭ ورتاق ماقساتىمىز – مۇگەدەكتىگى بار ادامداردى الەۋمەتتەندىرۋگە ىقپال ەتۋ، تۇلعا رەتىندە دامۋ ءۇشىن جاڭا مۇمكىندىكتەر اشۋ، ولاردىڭ العا ۇمتىلۋىنا قولداۋ كورسەتۋ جانە قوعامعا پايدالى بولۋ»، - دەدى جانات وماربەكوۆا.

سونىمەن، «مىقتى ەرىك-جىگەرى جانە جەڭىسكە دەگەن ۇمتىلىسى ءۇشىن» نوميناسياسى بويىنشا الپينيست، حالىقارالىق دارەجەدەگى سپورت شەبەرى ماريا اۋەزوۆا ماراپاتتالدى. بيىل ول ەۆەرەست بازالىق لاگەرىندە 5364 م جانە كالا پاتحار تاۋىندا 5640 م بيىكتىكتى باعىندىردى.

«ەرەكشە قاجەتتىلىكتەرى بار ادامدارعا قاتىستى قوعامدىق سانانىڭ وڭ وزگەرىستەرىنە قوسقان ۇلەسى ءۇشىن» سىيلىعىنىڭ يەگەرى قوعام قايراتكەرى نياز سۇندەتالييەۆ بولدى.

«ەرەكشە قاجەتتىلىكتەرى بار ادامداردىڭ پروبلەمالارى مەن ءومىرىن اقپاراتتىق قامتۋعا قوسقان ۇلەسى ءۇشىن» نوميناسياسى بويىنشا سىيلىقتى تانىمال بلوگەر الماس ەرجان الدى.

«ەرىكتىلەر قوزعالىسىن دامىتۋداعى جەتىستىكتەرى ءۇشىن» مۇسىنشەنىڭ يەگەرى قوعام قايراتكەرى گۇلناز قوسمۋرزييەۆا بولدى. ول پاندەميا كەزىندە قاراجات جيناۋدى ۇيىمداستىرىپ، 2 مىڭنان استام مۇقتاج جانعا كومەك كورسەتتى.

«كاسىپكەرلىك بەلسەندىلىكتى دامىتۋعا قوسقان ۇلەسى ءۇشىن» نوميناسياسى بويىنشا سىيلىقتى ەرەكشە قاجەتتىلىگى بار بالانىڭ اناسى گۇلميرا پارمىشيەۆا يەلەندى. ول ەرەكشە بالالارعا ارنالعان دامىتۋ ويىنشىقتارىن شىعاراتىن «كىshkentai» جوباسىن ىسكە قوسقان.

«ونەر جانە مادەنيەت سالاسىنداعى ۇزدىك جەتىستىكتەرى ءۇشىن» سىيلىعىنىڭ يەگەرلەرى بولىپ «ءبىز سىزدەردى جاقسى كورەمىز!» حالىقتىق كلوۋندار تەاترى تانىلدى. تەاتر ترۋپپاسى ەستۋ قابىلەتى بۇزىلعان ارتىستەردەن تۇرادى.

«سپورت سالاسىنداعى ۇزدىك جەتىستىكتەرى ءۇشىن» اتالىمىندا پاۋەرليفتينگ بويىنشا سپورتشى، 2016 جىلعى ريو-دە-جانەيرودا وتكەن جازعى پاراليمپيادا ويىندارىنىڭ كۇمىس جۇلدەگەرى راۋشان قويشىبايەۆا ماراپاتتالدى.