قازاقستاندا 3،5 مىڭعا جۋىق ادام دونورلىق ورگانداردى ترانسپلانتاسيالاۋدى قاجەت ەتەدى. بۇل تۋرالى بۇگىن ۇلتتىق عىلىمي كارديوحيرۋرگيالىق ورتالىعىنىڭ ترانسپلانتاسيا بويىنشا ۇيلەستىرۋشىسى ساۋلە شايسۇلتانوۆا شىمكەنت جۇرەك ورتالىعىندا وتكەن باسپا ءسوز كونفەرەنسياسىندا مالىمدەدى.
ساۋلە تالعات قىزىنىڭ ايتۋىنشا، جۇرەك الماستىرۋدى قاجەت ەتەتىندەردىڭ ىشىندە 150-گە جۋىعى بالالار.
- بۇگىندە بۇكىل الەمدە ترانسپلانتاسيالىق بەلسەندىلىكتىڭ ءوسۋى جانە دونورلىق پروسەستى ۇيىمداستىرۋدا ىلگەرىلەۋ بايقالادى. جىل سايىن ورگانداردى الماستىرۋ بويىنشا 115 مىڭنان استام وپەراسيا جاسالادى، ال زاماناۋي تەحنولوگيالار پاسيەنتتەردىڭ ءومىرىن كوپتەگەن جىلدارعا ۇزارتۋعا مۇمكىندىك بەرەدى. ءبىزدىڭ ەلىمىزدە قايتىس بولعاننان كەيىنگى دونوردان دونورلىق ورگانداردى ترانسپلانتاسيالاۋ 2012 جىلدان باستاپ جۇرگىزىلۋدە. وسى كەزەڭدە 84 جۇرەك جانە 14 وكپە ترانسپلانتاسياسى جاسالدى. دەگەنمەن دونورلىق ماسەلەسى ءبىز ءۇشىن ءالى كۇنگە دەيىن شەشىمىن تاپپاعان كۇردەلى ماسەلە، - دەيدى س. شايسۇلتانوۆا.
باسپا ءسوز كونفەرەنسياسىندا قالالىق دەنساۋلىق ساقتاۋ باسقارماسىنىڭ باسشىسى باقىتجان پوزيلوۆ قالاداعى جۇرەك ورتالىعىنىڭ ترانسپلانتاسيا جاساۋعا دايىن ەكەندىگىن اتاپ ءوتتى. جوسپار بويىنشا الداعى ءۇش ايدا جۇرەك ورتالىعىنىڭ ماماندارى اعزا الماستىرۋ وتاسىن جاساماق. بۇل ءۇشىن ەمدەۋ مەكەمەسىنىڭ وتا جاساۋ زالى وپەراسياعا قاجەتتى جوعارى تەحنولوگيالىق قۇرىلعىلارمەن جابدىقتالعان. بۇعان قوسا كارديوحيرۋرگ ماماندارى ارنايى وقىتۋدان ءوتىپ، بىلىكتىلىگىن ارتتىرعان.
پىكىر قالدىرۋ