شىمكەنت قالاسىنىڭ اكىمى مۇرات ايتەنوۆ نۇرسات تۇرعىن الابىنا بارىپ، اۋماقتىڭ اباتتانۋىمەن تانىستى. تۇرعىن الاپتا №109-117 ارالىعىنداعى 10 كوپقاباتتى ءۇيدىڭ اۋلاسى «Build Stroi» مەردىگەر مەكەمەسىنىڭ دەمەۋشىلىگىمەن اباتتانىپ، كوگالدانعان.

اۋلالاردىڭ 13 880 شارشى مەتر اۋماعىنا سۋ قۇبىرلارى تارتىلىپ، كىشى سۋ بۇرقاقتارى ورناتىلدى. بالالار ويىن الاڭشاسىنىڭ ەلەمەنتتەرى قايتا سىرلانىپ، گازون مەن اعاش كوشەتتەرىن وتىرعىزۋ جۇمىستارى اتقارىلعان.

قالامىزدىڭ دامۋى مەن تۇرعىندارعا جايلا ورتا قالىپتاستىرۋ باعىتىنداعى جۇمىستارعا كاسىپكەرلەر زور ۇلەس قوسىپ جاتقانىن ايتقان قالا باسشىسى، مۇنداي يگى ىستەر ءۇشىن مەردىگەرگە العىسىن ايتتى.

سونىمەن قاتار، شىمكەنت قالاسىنىڭ قاراتاۋ اۋدانى «اقجايىق» شاعىناۋدانىندا 14 كوپقاباتتى ءۇيدىڭ 2 اۋلاسىندا بالالار ويىن الاڭشاسى مەن جاتتىعۋ ترەناجەرلارىن ورناتۋ جۇمىستارى جۇرگىزىلدى. مەردىگەر مەكەمە «نۇرەكازيابيزنەس» ج ش س جانە «اگروسپەسمونتاج» ج ش س نىسانداردى قاراشا ايىندا تاپسىرۋدى جوسپارلاپ وتىر.

شىمكەنت قالاسىنىڭ اكىمى مۇرات ايتەنوۆ شاعىناۋدانداعى №63/27، 69/36، 37، 38، 40، 43، 44 ۇيلەردىڭ اۋلالارىندا ورنالاسقان بالالار ويىن الاڭشاسىنىڭ قۇرىلىسىمەن تانىسىپ، جۇمىس ساپاسىن باقىلادى. قالا اكىمى تۇرعىندارعا ەندى اباتتانعان اۋماقتى كۇتىپ-ۇستاۋ قاجەتتىگىن ايتتى.

بيىل اقجايىق، تۇران، اسار شاعىناۋداندارىندا 21 اۋلانى (39 ءۇي) اباتتاندىرۋعا 405،1 ملن تەڭگە قارجى قارالدى. قۇرىلىس جۇمىستارى قاراشادا اياقتالىپ، جاڭا نىساندار تۇرعىندار يگىلىگىنە بەرىلەدى.
شاھاردا اۋلالار جاڭارتىلىپ، قولايلى ورتا قالىپتاسىپ كەلەدى. ونىڭ ىشىندە «حالىق قاتىساتىن بيۋدجەت» جوباسى تابىستى ىسكە اسۋدا.