بۇل زاڭ ازىرگە قابىلدانعان جوق، قابىلدانعان جاعدايدا بارلىق بانكتەردىڭ ءموبيلدى قوسىمشالارىنداعى اۋدارىمدارعا قاتىستى. جەكە ادامداردىڭ بىر-بىرىنە اۋدارىمدارىنا سالىق تا سالىنبايدى، قاداعالانبايدى دا.  ال جەكە ادامداردىڭ كاسىپكەرلىك قىزمەت نە تاۋار اقىسى ءۇشىن اۋدارىم ارقىلى جاساعان تولەمى باقىلانادى، سالىق تولەۋدى تالاپ ەتەدى.

كەز-كەلگەن ادام ۇيالى قوسىمشا ارقىلى اۋدارىم جاساسا سالىق ۇستالادى ەكەن دەگەن جاڭساق پىكىر. اعايىن-تۋىسقا، دوس-جارانعا بۇرىنعىداي اۋدارىم جاساي بەرەسىز. ول ءۇشىن سىزدەن ەشكىم ەشتەڭە سۇرامايدى.

بۇل وزگەرىس تەك ءموبيلدى قوسىمشاداعى اۋدارىم قىزمەتىن پايدالانىپ، وزدەرى پايدا تاۋىپ، ءبىراق سالىق تولەمەيتىن كاسىپكەرلەرگە قاتىستى. كاسىپكەرلەر (دۇكەندەر مەن بۋتيكتەر يەسى، تاكسيستەر ت.ب.) قولما-قول اقشامەن عانا الامىز دەپ جاتىر. ولار قولما-قول اقشاعا  كوشسەك سالىق تولەمەيمىز دەپ ويلايدى. بۇل قاتە پىكىر. قولما-قول تولەمگە دە سالىق سالىنادى. كەز-كەلگەن كاسىپكەرلىك قىزمەتتەن تۇسكەن تابىسقا سالىق سالىنۋى كەرەك. تولەم اقىسىن قولما-قول نە ونلاين السا دا، كاسىپكەر تولەم تۇبىرتەگىن بەرۋى كەرەك. كاسىپكەر قولما-قول عانا الام دەسە تۇبىرتەك بەرۋدى تالاپ ەتىڭىز. قارسىلىق تانىتسا، سالىق ورگاندارىنا شاعىمدانا الاسىز. سول ارقىلى بيۋدجەتكە ءتۇسىم تۇسىرەسىز، كولەڭكەلى اقشانى اينالىمنان شىعاراسىز. وسى زاڭعا وزگەرىس ەنۋىنىڭ  ماقساتى دا سول، كولەڭكەلى اقشانى اينالىمنان شىعارۋ.

تولەم قابىلدايتىن ادام، تولەماقى قابىلداۋعا ارنالعان ارنايى قۇرىلعى الىپ ءجۇرۋ كەرەك ەمەس. بار بولعانى ۇيالى تەلەفونىنا بيزنەسكە ارنالعان Kaspi Pay ورناتسا بولدى. سول ارقىلى ءوز بيۋدجەتىن باسقارىپ، كىرىس-شىعىسىن كورە الادى، قارجىلىق، كاسىپكەرلىك ساۋاتىن ارتتىرادى.

زات ساتىپ الۋ كەزىندە اۋدارىم ارقىلى تولەسە +3% سۇراپ جاتقانداردى زاڭسىز. ويتكەنى،  بۇل زاڭ ءالى كۇشىنە ەنبەگەن زاڭ. كاسىپكەرلەردى ەشكىم ءالى باقىلاپ جاتقان جوق.  ءبىر جاعىنان  كاسىپكەرلەر ميكرو، شاعىن بيزنەس بويىنشا  2023 جىلعا دەيىن سالىقتان جەڭىلدىك العان.

Kaspi Gold-پەن تولەم قابىلدانبايدى دەگەن اقپارات تا جالعان اقپارات. كەز-كەلگەن جەردە Kaspi Gold-پەن تولەم قابىلدانادى. تەك كاسىپكەرلەر جاڭا وزگەرىستەردى وزدەرىنە ءتيىمسىز ساناپ اۋدارىم ارقىلى تولەم قابىلداماي جۇرگەن بولۋى كەرەك.

قارجى مينيسترلىگىنىڭ وكىلى ولجاس وتاردىڭ دەرەگىنشە، ءموبيلدى قوسىمشالار ارقىلى بىلتىر 35 ترلن تەڭگە اينالىمدا جۇرگەن. بيىل بۇل سوما 43 ترلن تەڭگەنى قۇرايدى. مىنە، وسى تريلليونداردان سالىق الىنسا، ول بيۋدجەتكە تۇسەدى، بيۋدجەتتەگى اقشا حالىقتىڭ جاعدايىن جاقسارتۋ ءۇشىن جۇمسالادى. سوندا ءسىز دە بيۋدجەتكە سالىق تۇسكەنىن قالامايسىز با؟..

«سالىقتان قورقۋدىڭ قاجەتى جوق. قاراپايىم حالىقتىڭ الاڭداۋعا ءجونى جوق. مىسالى ءبىر كاسىپكەرگە ءبىر كۇندە 50-100 رەت اۋدارىم جاسالعان بولسا، ارنايى باقىلايتىن بولامىز. ياعني، ۇزدىكسىز اقشا ءتۇسىپ تۇرسا باقىلاۋ جاسالىنادى. حابارلاما جىبەرىلەدى، بىردەن سالىق تولە دەمەيمىز. ەل شۋلادى ەكەن دەپ سالىقتان جالتارۋعا ۇلەس قوسپاۋىمىز كەرەك. جالپى كەز-كەلگەن سالادا قوعامدىق باقىلاۋ بولماي، دامىمايمىز. زاڭ بارىنە ورتاق. سوسىن بۇل وزگەرىسكە قارسى شىعۋ – كولەڭكەلى ەكونوميكانى قولداۋ»، – دەيدى ق ر قارجى مينيسترلىگىنىڭ مەملەكەتتىك كىرىستەر كوميتەتىنىڭ وندىرىستىك ەمەس تولەمدەردى اكىمشىلەندىرۋ باسقارماسى باسشىسىنىڭ ورىنباسارى ولجاس وتار.