24 قازان، جەكسەنبى كۇنى اقتوبە وبلىسىنىڭ اكىمى وڭداسىن ورازالين تەمىر اۋدانىنا جۇمىس ساپارىمەن باردى. ءوڭىر باسشىسى جولدا رەسپۋبليكالىق ماڭىزى بار "اقتوبە - قاندىاعاش" اۆتوجولىن قايتا جوندەۋ بارىسىن قاراپ شىقتى.

ەستەرىڭىزگە سالا كەتەيىك، "اقتوبە-قاندىاعاش" ۋچاسكەسىندەگى قۇرىلىس – مونتاجداۋ جۇمىستارى بيىل 11-100 شاقىرىم ارالىعىندا باستالعان بولاتىن. جوبانىڭ جۇزەگە اسىرىلۋ بارىسى تۋرالى "قازاۆتوجول "ۇك" اق اقتوبە فيليالىنىڭ باسشىسى مارات ماحامبەتوۆ ەسەپ بەردى.

"ەكى مەردىگەر ۇيىم جۇمىلدىرىلدى. قازىرگى تاڭدا 18 شاقىرىمعا اسفالت جابىندىسى توسەلسە، ونىڭ 10 شاقىرىمىنا ەكى قاباتتان توسەلدى. سول ون شاقىرىمى كولىك قوزعالىسىنا ءىشىنارا اشىق. جوبانى جۇزەگە اسىرۋ 2023 جىلعا دەيىن جالعاسىپ، 18 كوپىر مەن 66 سۋ وتكىزەتىن قۇبىرلار قالپىنا كەلتىرىلىپ، سالىنادى. بۇدان وزگە، اقكەمەر اۋىلىنىڭ جانىنان جەرگىلىكتى تۇرعىنداردىڭ وتىنىشىمەن مال ايدايتىن مالوتكەل سالىندى، بۇل جوبادا قاراستىرىلماعان"، - دەدى مارات ماحامبەتوۆ.

تەكسەرۋ قورىتىندىسى بويىنشا وبلىس اكىمى جۇمىستاردىڭ جوعارى ساپاسىن قامتاماسىز ەتۋ جانە ولاردى ىسكە اسىرۋ مەرزىمدەرىن ساقتاۋ بويىنشا ءبىرقاتار تاپسىرمالار بەردى.

ءوڭىر باسشىسى تەمىر اۋدانىنىڭ قوپا اۋىلىنداعى جاڭا دارىگەرلىك امبۋلاتوريا عيماراتىنىڭ اشىلۋىنا قاتىستى. مەديسينالىق مەكەمە ءبىر اۋىسىمدا 40 كەلۋشىگە ارنالعان. ونىڭ قۇرىلىسىنا مەملەكەت 115 ميلليون تەڭگە جۇمسادى.

"مۇنداي امبۋلاتوريانىڭ سالىنعانىنا وتە قۋانىشتىمىز. بۇرىنعى عيمارات تولىعىمەن توزعان ەدى. ونى ءوزىڭىز دە كوردىڭىز. ءقازىر بىزدە بارلىعى بار، دەگەنمەن كوشەلەردىڭ اسفالتتالعانىن قالايمىز"، - دەدى قوپا اۋىلىنىڭ تۇرعىندارى وبلىس اكىمىنە.

"بيىل اۋىلدىق ەلدى مەكەندەردى ەلەكتر، گاز، سۋ، جول ينفراقۇرىلىمىمەن قامتاماسىز ەتۋ بويىنشا ۇلكەن جۇمىستار اتقارىلدى. وتكەن جىلى ءسىزدىڭ اۋىلىڭىزداعى كىرەبەرىس جول اسفالتتالدى، ەندى نەگىزگى كوشەلەردەگى جولداردى جوندەۋگە كىرىسەمىز."، - دەدى وڭداسىن ورازالين.

"وبلىس جول ماسەلەسى جاعىنان ارتتا قالعانداردىڭ ءبىرى بولدى. سوڭعى 2-3 جىلدا بۇل ماسەلەنى شەشۋگە جالپى وتكەن 7-8 جىلدا قانشا قاراجات بولىنسە، سونشا قاراجات ءبولىندى. بيىل ءبىز وبلىستىڭ قاناعاتتانارلىق جاعدايداعى جولدارمەن قامتاماسىز ەتىلۋىن 66 پايىزعا دەيىن ارتتىرۋدى كوزدەپ وتىرمىز. وبلىستىڭ بارلىق اۋداندارىندا اۋداندىق جولدارمەن قاتار، وبلىستىق جانە رەسپۋبليكالىق ماڭىزى بار جولدارىندا دە جۇمىستار جۇرگىزىلىپ جاتىر. ەلدى مەكەندەردىڭ كوشەلەرىندەگى جولداردى دا اۋقىمدى تۇردە جوندەپ جاتىرمىز. كەلەر جىلى قارقىن مەن كولەمدى ۇلعايتامىز، ويتكەنى جولدىڭ جاعدايى – كاسىپكەرلىك پەن جالپى وبلىس ەكونوميكاسىن دامىتۋدا نەگىزگى ماسەلە"، - دەپ جالعاستىردى وبلىس اكىمى.

ءوڭىر باسشىسى قوپا اۋىلىنىڭ تۇرعىندارىنا اۋىلدى جانە ولاردىڭ ۇيلەرىنە ىرگەلەس اۋماقتاردى تازا ۇستاعاندارى ءۇشىن العىس ءبىلدىردى.
ءوڭىر باسشىسى تەمىر اۋدانى شۇبارقۇدىق كەنتى اۋدانىندا 1815-1896 جىلدارى ءومىر سۇرگەن كورنەكتى ءدىني قايراتكەر دوسجان حازرەتتىڭ مەموريالدىق كەشەنىندە بولدى.

دوسجان حازىرەت بالالاردى ءدىني ساۋاتقا ۇيرەتىپ، كوپتەگەن مەشىتتەردىڭ قۇرىلىسىنا ءوز ۇلەسىن قوستى. ونىڭ تىكەلەي باسشىلىعىمەن دوڭىزتاۋدا قاينار مەشىتى، ويىل وزەنىنىڭ بويىندا يشان اتا مەشىتى سالىندى.
وتكەن جىلى دەمەۋشىلىك قاراجات ەسەبىنەن دوسجان قاشاق ۇلىنىڭ جەرلەنگەن جەرىندە كەسەنەنى، قوناق ءۇيدى جانە شارۋاشىلىق-تۇرمىستىق وبەكتىلەردى سالۋمەن اۋقىمدى تۇردە قالپىنا كەلتىرۋ جۇمىستارى باستالدى. سونىمەن قاتار، كەشەن اۋماعىندا ورنالاسقان دوسجان حازرەتتىڭ ەجەلگى مەشىتىنىڭ قالدىقتارى ساقتالعان.

وڭداسىن ورازالين اۋدان اكىمى مەن ءتيىستى باسقارما باسشىلارىنا كيەلى نىسانداردى ساقتاۋ جانە كوپشىلىككە ناسيحاتتاۋ، سونداي-اق تۋريستىك سالانى جۇيەلى نەگىزدە دامىتۋ بويىنشا جۇمىستار جۇرگىزۋدى تاپسىردى.
ءدال وسى كۇنى شۇبارقۇدىقتا تۇشپارا وندىرەتىن جاڭا سەح اشىلدى. قۇنى 40 ميلليون تەڭگەنى قۇرايتىن جوبانى "اگروبيزنەس" باعدارلاماسى اياسىنداعى مەملەكەتتىك قولداۋدىڭ ارقاسىندا جەكە كاسىپكەر سۇلتانبەك جونيسوۆ ىسكە اسىردى. سەح قۋاتتىلىعى تاۋلىگىنە 500 كەلى ەت وڭدەۋگە ەسەپتەلگەن. سەح جانىندا ەت پاۆيلونى اشىلدى. نەگىزگى شيكىزات جەكە بورداقىلاۋ الاڭىنان جەتكىزىلەدى.

جۇمىس ساپارى جاڭا ساياباقتىڭ اشىلۋىمەن، شۇبارقۇدىق كەنتىنىڭ قىزىلجار شاعىن اۋدانىندا سۋمەن جابدىقتاۋ جۇيەسىنىڭ جانە ەكى جاڭا اۆتوجولدىڭ قۇرىلىس بارىسىن تەكسەرۋمەن اياقتالدى.

اۋدان اكىمىنە ىسكە اسىرىلىپ جاتقان جوبالاردىڭ بارىسىن تۇراقتى باقىلاۋدا ۇستاۋ، ولاردىڭ ساپالى جانە ۋاقتىلى اياقتالۋىن قامتاماسىز ەتۋ تاپسىرىلدى.