جۇڭگو اقپان ايىندا وتەتىن قىسقى وليمپيادا ويىندارىنا اۆستراليا، ۇلىبريتانيا جانە اقش ديپلوماتيالىق بويكوت جاريالاۋى "قاتە ارەكەت" بولعانىن، سول ءۇشىن "قۇن تولەيتىنىن" مالىمدەدى.
– امەريكا قۇراما شتاتتارى، ۇلىبريتانيا جانە اۆستراليا وليمپيادا پلاتفورماسىن ساياسي ايلا-شارعى جاساۋ ءۇشىن پايدالاندى. ولار قاتە ارەكەتتەرىنىڭ قۇنىن تولەۋگە ءماجبۇر بولادى، – دەدى جۇڭگو سىرتقى ىستەر مينيسترلىگىنىڭ باسپا ءسوز حاتشىسى ۆان ۆەنبين.
قىتايدىڭ ەسكەرتۋى بەيجىڭ وليمپياداسىنا بويكوت جاريالاعان باتىس ەلدەرىنىڭ سانى كوبەيىپ جاتقان كەزدە جاسالدى.
قازىرگە دەيىن اقش، اۆستراليا، ۇلىبريتانيا جانە كانادا بەيجىڭ قىسقى وليمپيادا ويىندارىنا ءوز مينيسترلەرىن جىبەرمەيتىنىن مالىمدەدى.
اقش پرەزيدەنتى دجو بايدەن الدىڭعى ايدا قىتايدا وتەتىن سپورت ويىندارىنا بويكوت جاريالاۋ جوسپارى بار ەكەنىن مالىمدەگەن. كەيىنىرەك اقش بەيجىڭ وليميپياداسىنا بويكوت جاريالاعان العاشقى ەل اتاندى.
ۆاشينگتوننىڭ بۇل ارەكەتىنەن كوپ وتپەي بەيجىڭ اقش-تى ايىپتادى.
حالىقارالىق ۇيىمدار جانە كوپتەگەن دەموكراتيالىق ەلدەر قىتايدى "شىڭجاڭ اۆتونومياسىندا تۇراتىن ۇيعىر، قازاق سياقتى مۇسىلمان ازشىلىقتارىنا گەنوسيد جاسادى" دەپ ايىپتايدى.
سونىمەن قاتار، بەيجىڭنىڭ گونكونگتاعى ساياسي بوستاندىقتاردى باسىپ-جانشۋ ارەكەتىنە قاتىستى دا شيەلەنىس كۇشەيە ءتۇستى.
پىكىر قالدىرۋ