الەمدە وميكرون شتامى تارالۋىنا بايلانىستى، ەپيدەميولوگيالىق احۋال ناشارلاي باستادى.

اقش-تا “وميكرون” شتامىن جۇقتىرعانداردىڭ سانى ەكى كۇن سايىن ەسەلەپ ارتۋدا. اقش ۇلتتىق اللەرگيالىق جانە جۇقپالى اۋرۋلار ينستيتۋتىنىڭ ديرەكتورى ەنتوني فاۋكيدىڭ ايتۋىنشا، “وميكرون” شتامىن جۇقتىرۋ سانى ءبىر اپتادا 8-10%-دان 73% - عا دەيىن وسكەن. 

گەرمانيا تۇرعىندارىنا پاندەمياعا بايلانىستى قارىم-قاتىناستى مۇمكىندىگىنشە شەكتەۋ ۇسىنىلدى. 28 جەلتوقساننان باستاپ جەكە كەزدەسۋلەرگە ەڭ كوپ دەگەندە 10 ادام قاتىسا الادى دەپ كۇتىلۋدە. ۆاكسيناسيالانباعان ادامدار تەك بىرگە تۇراتىن ادامدارمەن ارالاسا الادى. سونىمەن قاتار تۇنگى كلۋبتار مەن ديسكوتەكالار جابىلۋى مۇمكىن.

تايلاند پحۋكەتتەن باسقا ساياحاتتاۋعا بولاتىن بارلىق پروۆينسيانى شەتەلدىك تۋريستەر ءۇشىن ۋاقىتشا جاۋىپ تاستادى. ەل بيلىگى بارلىق كەلۋشىلەر ءۇشىن مىندەتتى كارانتين ەنگىزۋدى قايتا قاراستىرۋدا.

ۇلتتىق حوككەي ليگاسى ويىن ماۋسىمىن ۋاقىتشا توقتاتۋ تۋرالى شەشىم قابىلدادى. ليگادا مۇنداي شەشىم كوروناۆيرۋستى جۇقتىرعان ويىنشىلار مەن كلۋب قىزمەتكەرلەرى سانىنىڭ كۇرت ءوسۋى جانە 50-گە جۋىق تۇراقتى چەمپيونات ويىندارىن ماجبۇرلەپ كوشىرۋ اياسىندا قابىلداندى.