ۇلتتىق قاۋىپسىزدىك كوميتەتى كوميتەت ءتوراعاسىنىڭ ءبىرىنشى ورىنباسارى سامات ءابىش دەمالىستا ەكەنى تۋرالى اقپاراتتى تولىقتىردى.
"ۇستىمىزدەگى جىلعى 13 قاڭتاردان باستاپ ول جىل سايىنعى دەمالىسىندا" دەلىنگەن اقپاراتتىق حابارلامادا.
بۇعان دەيىنگى اقپاراتتا دەمالىس داتاسى جازىلماعان بولاتىن.
5 قاڭتاردا ۇلتتىق قاۋىپسىزدىك كوميتەتى ءتوراعاسىنىڭ ءبىرىنشى ورىنباسارى لاۋازىمىنا مۇرات نۇرتىلەۋ تاعايىندالعاندا سامات ءابىش قىزمەتىنەن كەتكەنى تۋرالى اقپاراتتار شىققان.
سامات ءابىشتىڭ دەمالىسى تۋرالى ۇلتتىق قاۋىپسىزدىك كوميتەتىنىڭ العاشقى، دەمالىسقا شىعۋ داتاسى جازىلماعان اقپاراتىنان كەيىن الەۋمەتتىك جەلىدە سامات ابىشتەي ۇلتتىق قاۋىپسىزدىككە جاۋاپتى ورگان باسشىسىنىڭ ءبىرىنشى ورىنباسارى ەلدە دۇربەلەڭ بولىپ جاتقاندا قالاي عانا دەمالىستا جۇرەدى دەپ جازۋشىلار بولعان.
قوعام بەلسەندىسى مۇحتار تايجان ۇقك تاراتقان اقپاراتقا سەنبەيتىنىن جازعان.
"ەل اياققا تىك تۇرىپ، اتىس بولىپ، ادام ءولىپ، اكىمشىلىك ورتەنىپ، ۇقك دەپارتامەنتىن باسىپ الىپ، ىشكى ىستەر دەپارتامەنتىنە شابۋىل جاسالىپ جاتقاندا ۇقك ءبىرىنشى ورىنباسارى قالاي عانا دەمالىستا بولادى. ءوز باسىم بۇل اقپاراتقا سەندەيمىن. شاماسى شىندىقتى كەيىنىرەك بىلەتىن سياقتىمىز" دەدى مۇحتار تايجان.
جىبەك اشىرجانتەگى ەسىمدى facebook قولدانۋشىسى دا سامات ءابىش قىزمەتىندە بولىپ، ەلدەگى جاعدايدا دەمالىستا جۇرگەنىنە نارازى.
"ەلدىگىمىزدەن ايىرلىپ قالا جازداپ، تالاي بەيكۇنا ادامنىڭ قانى توگىلىپ، ءبىز شار قۇرىپ ىزدەپ جۇرسەك، مىنا كىسى ەڭبەك دەمالىستا ەكەن. ەلدە توتەنشە جاعداي جاريالانىپ جاتقاندا دەمالىستاعى كىسىنى شۇعىل شاقىرتۋعا بولماي ما؟ الدە دەمالىسىنا كەدەرگى كەلتىرۋگە بولمايتىندا قاتتى جۇمىس ىستەپ قويدى ما؟" دەپ جازادى ول.
سامات ءابىش قازاقستاننىڭ بۇرىنعى پرەزيدەنتى نۇرسۇلتان نازاربايەۆتىڭ تۋعان ءىنىسى ساتىبالدى نازاربايەۆتىڭ بالاسى.
رەسەي ءباسپاسوزى بۇعان دەيىن سامات ءابىش پەن ونىڭ اعاسى قايرات ساتىبالدى دۋبايدا ۇستالعانى تۋرالى اقپارات تاراتقان.
وقي وتىرىڭىز:
پىكىر قالدىرۋ