"سامۇرىق-قازىنا" ۇلتتىق ءال-اۋقات قورىنىڭ باسقارما ءتوراعاسى الماسادام ساتقالييەۆ الەۋمەتتىك جەلىدەگى پاراقشاسىندا ۇسىنىلعان تۇجىرىمدامالار مەن قوردىڭ الداعى تاعدىرى تۋرالى ايتتى.
ساتقالييەۆ قازاقستان حالقىنا ەسكەرتپەلەر مەن ۇسىنىستارى ءۇشىن العىسىن ءبىلدىرىپ، كوتەرىلگەن وزەكتى ماسەلەلەردىڭ ءبىرى قوردى ەل ەكونوميكاسىنىڭ سۋبەكتىسى رەتىندە ۇستاۋدىڭ ماقساتقا ساي ەكەنىن اتاپ ءوتتى.
– كوپتىڭ كوكەيىندە جۇرگەن ماسەلەلەردىڭ ءبىرى – ق ر ەكونوميكاسىنىڭ سۋبەكتىسى رەتىندەگى قوردىڭ قىزمەتىن دوعارۋ. ۇسىنىستار ىشىندە ۇلتتىق كومپانيالاردى سالالىق مينيسترلىكتەردىڭ باسقارۋىنا تاپسىرۋ ۇسىنىلىپ وتىر. الەمدىك تاجىريبە كورسەتكەنىندەي، مۇنداي مەحانيزم سىبايلاس جەمقورلىق تاۋەكەلدەرىن ەسەلەپ ۇلعايتادى. تيىمدىلىكتى جوعالتىپ، ينۆەستيسيالىق كليماتتىڭ ناشارلاۋىنا اكەلىپ سوعادى. مەملەكەت رەتتەۋشى، مەنشىك يەسى، الەۋمەتتىك باعدارلامالداردى ىسكە اسىرۋشى قۇزىرەتتەرىن ءبارىن تەڭدەي پايدالانا المايدى. مۇددەلەر قايشىلىعى پايدا بولادى. تەڭگەرىمدى ساقتاپ قالۋ ءۇشىن اكتيۆتەردى كومپوراتيۆتىك باسقارۋعا بەرۋ عانا ءتيىمدى. ستەيكحولدەرلەر – قازاقستان ازاماتتارى بۇل پروسەستى تولىق باقىلاۋىنا الا الادى، – دەپ جازدى ول.
الماسادام ساتقالييەۆتىڭ سوزىنشە، قوردا تومەندەگىدەي فۋنكسيالار ساقتالۋى ءتيىس:
- ستراتەگيالىق ماڭىزى بار اكتيۆتەردى باسقارۋ؛
- ق ر ۇكىمەتىنىڭ ەكونوميكانى ءارتاراپتاندىرۋ، شاعىن جانە ورتا بيزنەستى جانە وتاندىق وندىرۋشىلەردى قولداۋ جونىندەگى اگەنتى قىزمەتى؛
- ينفراقۇرىلىمعا جانە ەكونوميكانىڭ شيكىزاتتىق ەمەس سەكتورلارىنا ينۆەستيسيا قۇيۋ، ناقتى جوبالار مەن جاڭا جۇمىس ورىندارىن قۇرۋعا ىقپال ەتۋ؛
- جەكە سەكتورعا قولجەتىمسىز شارتتار نەگىزىندە جوبالاردى قارجىلاندىرۋدى قامتاماسىز ەتۋ ارقىلى جاڭا نارىقتاردى قالىپتاستىرۋ؛
- الەۋمەتتىك ماڭىزى بار جوبالاردى ىسكە اسىرۋ.
بۇعان دەيىن قور باسشىسى "سامۇرىق-قازىنانى" الداعى ۋاقىتتا جوسپارلار اشىق اقپارات كوزدەرىندە جانە كورپوراتيۆتىك سايتتا جاريالاناتىنىن ايتقان بولاتىن.
21 قاڭتاردا پرەزيدەنت قاسىم-جومارت توقايەۆ قازاقستاننىڭ ءىرى بيزنەسمەندەرىمەن كەزدەسۋىندە "سامۇرىق-قازىنا" قورىن تۇبەگەيلى رەفورمالاۋ قاجەتتىگىن ايتقان.
مەملەكەت باسشىسىنىڭ ايتۋىنشا، قور جۇمىسى اشىق جۇرگىزىلمەي وتىر جانە ساتىپ الۋلار جۇيەسى ءتيىمسىز.
توقايەۆ ءوز سوزىندە اۋقىمدى جوبالار اياعىنا دەيىن جەتكىزىلمەي جاتقانىن اتاپ ءوتىپ، قورعا تۇبەگەيلى رەفورما جاساۋدى تاپسىرعان. اتالعان ماسەلە بويىنشا پرەزيدەنت الماسادام ساتقالييەۆپەن سويلەسكەنىن، ەگەر ول جۇكتەلگەن مىندەتتى اتقارا الماسا، ءوزى دە، قور دا بىرگە كەتەتىنىن مالىمدەگەن.
پىكىر قالدىرۋ