دەنساۋلىق ساقتاۋ ءمينيسترى اجار عينيات ۇكىمەت وتىرىسىندا بيزنەس وبەكتىلەرىنە "Ashyq" جوباسىن ودان ءارى ەنگىزۋ جالعاستىرىلاتىنىن جانە ءبىرقاتار شەكتەۋلەر الىنىپ تاستالعانىن مالىمدەدى.

–  "جاسىل" جانە "كوك" ستاتۋسى بار كەلۋشىلەردى كىرگىزەتىن بارلىق ايماقتا، بارلىق نىساندا جۇمىس ۋاقىتى بويىنشا شەكتەۋ الىنىپ تاستالدى. ەپيدەميولوگيالىق ءقاۋىپ ايماعىنا قاراماستان "Ashyq"-تا تەك "جاسىل" مارتەبەسىن پايدالانۋ كەزىندە سالتاناتتى، ەسكە الۋ، سپورت ءىس-شارالارى، كورمەلەر، فورۋمدار ەش شەكتەۋلەرسىز وتكىزىلەدى. سپورت كەشەندەرى، ساۋىقتىرۋ جانە ءدىني وبەكتىلەر، ويىن-ساۋىق نىساندارى، ساۋدا-ويىن ساۋىق ورتالىقتارى مەن ساۋدا جەلىلەرىنىڭ قىزمەتىنە شەكتەۋ قويىلمايدى، – دەدى ا. عينيات.

ءمينيستردىڭ سوزىنشە، ەپيدەميولوگيالىق ءقاۋىپ ايماعىنا قاراماستان "كوك" مارتەبەسى بار بولعان كەزدە وتەلدەرگە، قوناق ۇيلەرگە، اۋەجايلارعا، تەمىرجول، اۆتوۆوكزالدارعا، حالىققا قىزمەت كورسەتۋ ورتالىقتارىنا، "قازپوشتا" بولىمشەلەرىنە، بانكتەرگە، اسحانا تۇرىندەگى قوعامدىق تاماقتانۋ وبەكتىلەرىنە، جابىق بازارلارعا، ءبىلىم بەرۋ ۇيىمدارىنا، سپا-ورتالىقتارعا، ءسان سالوندارىنا، وبلىسارالىق، وبلىسىشىلىك، قالالىق تاسىمالداۋلارعا شەكتەۋسىز كىرۋگە رۇقسات ەتىلەدى.

– "كوك" ستاتۋسى بار ادامدارعا كىرۋگە رۇقسات بەرىلگەن ءبىرقاتار وبەكت ءۇشىن "جاسىل" ايماقتا شەكتەۋلەر الىنىپ تاستالدى. "سارى" ايماقتا 70 پايىزعا دەيىن، "قىزىل" ايماقتا 60 پايىزعا دەيىن جانە مەيرامحانالار، مادەني وبەكتىلەر، بالالار مەن ەرەسەكتەر ءۇشىن ساۋدا، جانە ويىن-ساۋىق ورىندارى بويىنشا تولىمدىلىق ۇلعايتىلدى، – دەدى مينيستر.

جاقىن بايلانىستا بولعان جانە سيمپتومسىز ناۋقاستار ءۇشىن كارانتين مەرزىمىن قىسقارتىلدى.

– سونىمەن، جاقىن بايلانىستا بولعان جانە سيمپتومسىز ناۋقاستار ءۇشىن كارانتين مەرزىمى 14-تەن 10 كۇنگە دەيىن قىسقارتىلدى. بۇل رەتتە 7 تاۋلىكتەن كەيىن پتر-زەرتتەۋدىڭ تەرىس ناتيجەسى بولعان كەزدە كارانتين اياقتالادى. ەگەر قانداي دا ءبىر سەبەپتەرمەن 7 تاۋلىككە ارنالعان پتر-تەست تاپسىرىلماسا، وندا كارانتين تەستتى قوسىمشا تاپسىرۋسىز 10-شى كۇنى اياقتالادى، – دەپ اتاپ ءوتتى اجار عينيات ۇكىمەتتىڭ كەڭەيتىلگەن وتىرىسىندا.