ق ر پارلامەنتىنىڭ سەناتى مەن پرەزيدەنتىن الەۋمەتتىك جەلىلەر مەن مەسسەندجەرلەر جۇمىسىن شەكتەۋگە مۇمكىندىك بەرەتىن تۇزەتۋلەردى قابىلداۋدان باس تارتۋعا شاقىرعان پەتيسيا جاريالاندى. پەتيسيا اۆتورى جۋرناليست، Factcheck Kazakhstan جوباسىنىڭ باس رەداكتورى دۋمان سماقوۆ. قازىرگى ۋاقىتتا پەتيسياعا 2500-دەن استام ادام قول قويعان.
 
اۆتور تۇزەتۋلەر قابىلدانىپ كەتسە، Facebook، Instagram، Youtube، Telegram، Whatsapp جانە باسقا دا جەلىلەردىڭ قازاقستان ينتەرنەت كەڭىستىگىندە جۇمىس ىستەۋىنە ءقاۋىپ تونەتىنىن ايتادى.

جۋرناليست تۇزەتۋ اۆتورلارى مۇنداي قادام بالالاردى كيبەربۋللينگتەن (كيبەربۋلليڭنەن) قورعاۋ ءۇشىن جاسالىپ وتىرعانىن ايتقانىمەن، بۇل قادامداردىڭ ارتىندا سەنزۋرانى كۇشەيتۋ مەن الەۋمەتتىك جەلىنى باقىلاۋدى ارتتىرۋ تۇرعانى انىق دەپ سانايدى.

"ءبىز سەناتتان زاڭ جوباسىن ماجىلىسكە قايتارۋدى، سونىمەن قاتار، ق ر قۇقىق قورعاۋ ۇيىمدارىمەن، مەملەكەتتىك ەمەس ب ا ق وكىلدەرىمەن جانە قوعامدىق ۇيىم وكىلدەرىنىڭ قاتىسۋىمەن زاڭ جوباسىن مىندەتتى تۇردە قايتا تۇزەۋدى تالاپ ەتەمىز. زاڭ جوباسى وسى قالپىندا قابىلدانسا – ءبىزدىڭ قوعام ونداعان جىلعا ارتقا كەتەرى ءسوزسىز. بۇعان قوسا، ساياسي جانە ەكونوميكالىق تۇرعىدان شەتتەتىلگەن مەملەكەتتەرمەن ءبىر قاتاردا بولۋ ءقاۋپى بار. بارشا قازاقستاندىقتاردى وسى ۇندەۋگە قوسىلۋعا شاقىرامىز. Cەبەبى بۇل زاڭ جوباسى ءارقايسىمىزدىڭ بولاشاعىمىزعا قاتىستى!" دەيدى اۆتور.