ۋكراينا ينفراقۇرىلىم ءمينيسترى الەكساندر كۋبراكوۆ پەن تۇركيانىڭ ساۋدا ءمينيسترى مەحمەت مۋش سوعىستان كەيىن ۋكراينانى قالپىنا كەلتىرۋ ىسىنە تۇرىك تارابىنىڭ قاتىسۋى قاراستىرىلعان ءوزارا تۇسىنىستىك مەموراندۋمىنا قول قويدى. ۋكراينا پرەزيدەنتى باسپا ءسوز قىزمەتىنىڭ حابارلاۋىنشا، قۇجاتقا ۆلاديمير زەلەنسكيي مەن تۇركيا پرەزيدەنتى رەجەپ تايىپ ەردوعاننىڭ لۆوۆتاعى كەلىسسوزدەرى اياسىندا قول قويىلعان، دەپ جازادى currenttime.tv پورتالى.

"تۇركيا – ءبىزدىڭ ستراتەگيالىق وداقتاسىمىز. ءبىز رەسەي قيراتقان ينفراقۇرىلىمدى قالپىنا كەلتىرۋ كەزىندە ىنتىماقتاستىققا دايىن بولعاندارى ءۇشىن تۇركيالىق ارىپتەستەرىمىزگە العىس ايتامىز. تۇرىك كاسىپكەرلەرىنىڭ جولدار مەن كوپىرلەردى، اتاپ ايتقاندا زاپوروجە جانە كرەمەنچۋگ كوپىرلەرىن سالۋدا تاجىريبەسى مول جانە ءوزىن سەنىمدى سەرىكتەس رەتىندە كورسەتە ءبىلدى. سول سەبەپتى جاقىندا ينفراقۇرىلىمدى بىرلەسىپ قالپىنا كەلتىرۋدە ناقتى ناتيجەگە جەتەمىز دەگەن ويدامىز"، دەدى ۋكراينا ينفراقۇرىلىم ءمينيسترى الەكساندر كۋبراكوۆ. 

كەلىسسوز بارىسىندا، ءبىرىنشى جوبا رەتىندە بۋچا مەن يرپەندى كييەۆپەن بايلانىستىراتىن كييەۆ وبلىسى رومانوۆكا اۋىلىنداعى كوپىردى قالپىنا كەلتىرۋ ماسەلەسى تالقىلاندى. 

"تۇركيا پرەزيدەنتىنىڭ ۋكرايناعا ساپارى – قۋاتتى مەملەكەتتىڭ ۋكرايناعا قولداۋ ءبىلدىرۋىنىڭ ايقىن دالەلى" دەپ مالىمدەدى زەلەنسكيي. 

ول ەردوعانمەن استىقتى ۋكراين پورتتارى ارقىلى شىعارۋدى جاقسارتۋ، زاپوروجەدەگى اەس احۋالى، ماسكەۋدىڭ "يادرولىق بوپساسى"، "رەسەيدىڭ بيداي ۇرلاۋى" جانە قورعانىس سالاسىنداعى ارىپتەستىك ماسەلەسىن تالقىلاعان.

زەلەنسكيي مەن ەردوعان كەلىسسوزدەرى لۆوۆتاعى پوتوسكيي سارايىندا وتكەن.