قازاقستان حالقى اسسامبلەياسى ۋكراينانىڭ قازاقستانداعى ەلشىسى پەتر ۆرۋبليەۆسكييدىڭ رەسەي باسقىنشىلىعى تۋرالى "كەلەشەكتە ولار ءبىزدىڭ بالالارىمىزدى ولتىرمەۋى ءۇشىن ورىستاردى كوپتەپ ولتىرەمىز" دەپ ايتقانىنا بايلانىستى مالىمدەمە جاسادى.
اسسامبلەيا ۇندەۋىندە، ۇيىم ەلشىنىڭ سوزدەرىن قاتاڭ ايىپتايتىنى، ونداي سارىنداعى مالىمدەلەرگە جول بەرۋگە بولمايتىنى ايتىلعان.
"بەيبىتشىلىك پەن بىرلىك ءبىزدىڭ مەملەكەتتىك ساياساتتىڭ جانە قوعامدىق بىرىگۋدىڭ باستى قاعيدالارى. سوندىقتان مۇنداي پىكىردى كىم ايتسا دا ءبىزدىڭ قارسىلىعىمىزعا ۇشىرايدى. ديپلوماتيا – وشپەندىلىك پەن ارازدىقتى قوزدىرۋ ءۇشىن ەمەس، بەيبىتشىلىك پەن ىنتىماقتاستىق يدەالدارىنا قىزمەت ەتۋى ءتيىس. قازاقستاننىڭ ءبىرتۇتاس كوپەتنوستى حالقى ءۇشىن دوستىق، ءوزارا كومەك جانە بەيبىتشىلىك قاعيدالارى مىزعىمايتىن ۇستانىم. ولار بىزگە تاۋەلسىزدىگىمىزدىڭ قالىپتاسۋىنىڭ ەڭ قيىن جىلدارىندا دا ەتنوسارالىق قاقتىعىستاردىڭ الدىن الىپ، ەلىمىز بەن حالقىمىزدىڭ تۇتاستىعىن ساقتاۋعا كومەكتەستى. وشپەندىلىكتى قوزدىراتىن كەز-كەلگەن پىكىر، ەتنوستىق جەك كورۋشىلىك پەن ونىڭ قانداي بولماسىن كورىنىستەرىن ناسيحاتتاۋ ءبىز ءۇشىن جات ۇعىم" دەلىنگەن اسسامبلەيا ۇندەۋىندە.
قازاقستان حالقى اسسامبلەياسى مالىمدەمە كوپ جاساي بەرمەيدى. اسىرەسە جۇرتشىلىق ەلدە سوڭعى جىلدارى بولعان ەتنوسارالىق جانجالدار كەزىندە اسسامبلەيادان ناقتى ارەكەتتەر كۇتكەن. الايدا ۇيىم كونفليكتەردە ءۇنسىز قالىپ وتىردى. ەل اراسىندا اسسامبلەيانىڭ قوعام ءۇشىن اتقارىپ وتىرعان قىزمەتى شامالى، ونى تاراتۋ كەرەك دەگەن كوزقاراستاعى ادامدار از ەمەس.
پىكىر قالدىرۋ