جۇكتىلىككە، بوسانۋعا جانە جاڭا تۋعان بالانى اسىراپ الۋعا بايلانىستى تابىسىنان ايىرىلعان جاعدايدا تولەنەتىن الەۋمەتتىك تولەمدى تاعايىنداۋ ءۇشىن ءوتىنىشتى ەندى ەلەكتروندىق ۇكىمەت پورتالى ارقىلى بەرۋگە بولادى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگى حابارلادى.

ەGov.kz پورتالى ارقىلى ءوتىنىش بەرۋ ءۇشىن باستى بەتتە "الەۋمەتتىك قامسىزداندىرۋ" ءبولىمىن اشىپ، "وتباسىلارعا كومەك" تارماعىن تاڭداپ، ءتيىستى قىزمەتتى تابۋ كەرەك.

وسىدان كەيىن پايدالانۋشى پورتالدا اۆتوريزاسيالانىپ، ونلاين قىزمەتكە تاپسىرىس بەرۋى، بارلىق مىندەتتى قاتارلاردى تولتىرۋى، تالاپ ەتىلەتىن فايلداردى تىركەۋى جانە ۇسىنىلعان نۇسقالاردىڭ بىرىمەن وتىنىمگە قول قويۋى قاجەت.

ءوتىنىمدى eGov.kz پورتالىندا قاراۋ مەرزىمى 8 جۇمىس كۇنىن قۇرايدى. سوماسى كورسەتىلگەن تولەم تاعايىنداۋ تۋرالى حابارلاما نەمەسە باس تارتۋ تۋرالى دالەلدى جاۋاپ پايدالانۋشىنىڭ جەكە كابينەتىنە جىبەرىلەدى.

ەلەكتروندىق قۇجات جانە سۇراۋ سالۋ ناتيجەسى تۋرالى حابارلاما ودان ءارى جەكە كابينەتتە، "قىزمەتتەردى الۋ تاريحى" بولىمىندە قولجەتىمدى بولادى.

اتالعان قىزمەتتى eGov.kz پورتالى ارقىلى الۋ ءۇشىن جۇمىس بەرۋشىنىڭ كادر قىزمەتى تولتىراتىن ەڭبەك شارتتارىن ەسەپكە الۋدىڭ ءبىرىڭعاي جۇيەسىنەن ەلەكتروندىق مالىمەتتەر قاجەت. سوندىقتان قىزمەتتى الۋشى جۇكتىلىككە جانە بالا تۋۋعا، جاڭا تۋعان بالانى اسىراپ الۋعا بايلانىستى دەمالىسقا شىعۋ تۋرالى ءتيىستى دەرەكتەردىڭ E-HR-گە ەنگىزىلگەنىن ناقتىلاۋى قاجەت.