اپتاپ ىستىق قىتايدى ابىگەرگە سالىپ جاتىر. تابيعاتتىڭ توسىن مىنەزىنەن جۇڭگو ەكونوميكاسىنا شىلدە ايىندا 400 ميلليون دوللار شىعىن كەلگەن، دەپ جازادى ءۆۆس-دىڭ ورىس قىزمەتى.

شانحايدىڭ يانسزى ايماعىن جانە قىتايدىڭ وڭتۇستىك-باتىسىندا ورنالاسقان سىچۋان پروۆينسياسىن بىرنەشە اپتا بويعى قاتتى ىستىق سالدارىنان قۇرعاقشىلىق جايلادى.  سىچۋانداعى 40 گرادۋستىق ىستىق پەن جاۋىن-شاشىننىڭ از ءتۇسۋى ەلەكتر ەنەرگياسىنىڭ جەتىسپەۋشىلىگىنە اكەپ سوقتىرعان. سوندىقتان پروۆينسيا بيلىگى كەيبىر ونەركاسىپ ورىندارىن ەلەكترمەن جابدىقتاۋدى شەكتەۋگە ءماجبۇر بولدى.

گەرمانيالىق Volkswagen اۆتوموبيل ءوندىرۋشىسى سىچۋان پروۆينسياسىنىڭ ورتالىعى چەندۋ قالاسىنداعى زاۋىتى ۋاقىتشا جۇمىس ىستەمەيتىنىن حابارلادى.

Apple-گە ارنالعان بولشەكتەردى جەتكىزەتىن Foxconn كومپانياسى سىچۋان پروۆينسياسىنداعى زاۋىتىن جاپتى، ءبىراق بۇدان ءوندىرىستىڭ جالپى كولەمىنە كەلەتىن زيان "شامالى" ەكەنى ايتىپ جاتىر.

ىستىق سالدارىنان 400 ميلليوننان استام قىتايلىقتى اۋىز سۋمەن قامتاماسىز ەتەتىن الەمدەگى ءۇشىنشى ءىرى وزەن – يانسزىداعى سۋ دەڭگەيى تومەندەپ كەتكەن. يانسزى ارناسىنداعى سۋ دەڭگەيى نەگىزى سوڭعى بەس جىلداعى ورتاشا كورسەتكىشتەن 50%-عا تومەندەگەن.

سۋ دەڭگەيىنىڭ ءتۇسۋى گيدروەنەرگەتيكادان ەنەرگيانىڭ 80%-دان استامىن الىپ وتىرعان سىچۋان پروۆينسياسىنا قاتتى اسەر ەتتى.

جۇڭگو توتەنشە جاعدايلار مينيسترلىگىنىڭ مالىمەتىنشە، قۇرعاقشىلىق سالدارىنان 780 مىڭنان استام ادام مەملەكەت قولداۋىنا مۇقتاج. زارداپ شەككەن اۋداندارعا اۋىز سۋ اۆتوسيستەرنالارمەن جەتكىزىلىپ جاتىر.

وتكەن اپتادا مينيسترلىك شىلدە ايىندا ىستىقتىڭ ەكونوميكالىق شىعىنى 2،73 ملرد يۋان (400 ملن دوللار) قۇرادى دەپ حابارلاعان. قارجى مينيسترلىگى اپاتتاردان زارداپ شەككەندەرگە كومەكتەسۋ ءۇشىن 300 ميلليون يۋان (44،30 ميلليون دوللار) بولەتىنىن ءمالىم ەتتى.