ۆەنگريادا سينوپتيكتەردىڭ ەلدەگى مەملەكەتتىك دەڭگەيدە اتاپ وتىلەتىن اۋليە يشتۆان كۇنىنە ارنالعان بولجامى سايكەس كەلمەي قالىپ، مەتەورولوگيالىق قىزمەت باسشىسى جۇمىسىنان الىنعان. بۇل تۋرالى ۆۆس حابارلادى.

اۋليە يشتۆان كۇنى وتكەن سەنبىدە ەل استاناسى بۋداپەشتتە مەرەكەلەنۋى كەرەك بولعان. اۋليە يشتۆان بيلىكتى ورتالىقتاندىرعان، ۆەنگريانى حريستيان مەملەكەتىنە اينالدىرعان جانە ەلدىڭ نەگىزىن قالاۋشى بولىپ سانالادى.

مەرەكەنى تويلاۋ بارىسىندا ۇيىمداستىرۋشىلار ەۋروپاداعى ەڭ ۇلكەن وت شاشۋ جاساۋدى جوسپارلاپ، 40 مىڭ فەيەرۆەرك ساتىپ العان. فەيەرۆەركتەر  دۋناي وزەنىنىڭ بويىن جاعالاي 240 جەرگە ورناتىلادى. ەرەكشە كورىنىستى 2 ميلليونعا جۋىق ادام تاماشالايدى دەپ جوسپارلاعان.

اۋقىمدى ءىس-شاراعا جەتى ساعات قالعاندا مەتەورلار ۇكىمەتكە ەل استاناسىنا نوسەر كەلە جاتقانىن ەسكەرتىپ، جەدەل حابارلاما جولدايدى. ەل ۇكىمەتى سينوپتيكتەردىڭ سوزىنەن كەيىن ءىس-شارانى امالسىز كەيىنگە قالدىرادى.

الايدا سينوپتيكتەر بولجاعانداي، ەل استاناسىنا نوسەر تۇرماق، ءبىر تامشى دا جاۋمايدى. اۋا رايىن بولجاۋ قىزمەتىندەگىلەر مەرەكەنىڭ شىرقى بۇزىلعانى ءۇشىن كەشىرىم سۇراپ، اۋا رايىنىڭ ىقتيمالدىعى اسا تومەن سەنارييى بولعانىن، مۇنداي جاعداي كەزدەسىپ تۇراتىنىن جەتكىزگەنىمەن، يننوۆاسيالار جانە تەحنولوگيالار ءمينيسترى لاسلو پالكوۆيچ ۆەدومستۆوعا قاراستى مەتەوقىزمەت باستىعى مەن ونىڭ ورىنباسارىن قىزمەتىنەن الدى.

بۇنى ۆەنگرلەر تۇرلىشە قابىلداپ جاتىر. كەيبىرەۋلەر ۇكىمەت مەتەورولوگتاردى جۇمىستان شىعارعانىن قۇپتاماسا، باسقالارى سينوپتيكتەردىڭ قاتەلىگىنە اشۋلانىپ، شەشىمدى جاقتايتىنداي. اتاۋلى كۇندى مەرەكەلەۋ 27 تامىزعا جوسپارلانىپ وتىر. ۆەنگرلەر وت شاشۋ سول كۇنى مىندەتتى تۇردە بولادى دەپ ۇمىتتەنىپ وتىر.