قوستاناي وبلىسىنداعى لەسنوە، وزەرنوە، باعانالى، كالينينو اۋىلدارى مەن ورمان القابىندا ءورت ءسوندىرۋ ءالى دە جالعاسىپ جاتىر.

ءورتتى سوندىرۋگە 196 بىرلىك تەحنيكا، 7 اۋە كەمەسى، 5 ءورت پويىزى، جەكە قۇرامنىڭ 1526 ادامى، ءاسكەري-اۋە كۇشتەرى ارميا اۆياسياسىنىڭ مي-171 تىكۇشاقتارى جۇمىلدىرىلعان. قورعانىس مينيسترلىگى ءورت ءسوندىرۋ جۇيەسى بار مي-17 تىكۇشاقتارىنىڭ تاعى ۇشەۋى دايىن تۇرعانىن حابارلادى. 

قازگيدرومەتتىڭ مالىمەتىنشە، ءورت شارپىعان اۋليەكول اۋدانىندا اۋا تەمپەراتۋراسى ءالى دە جوعارى – 31 گرادۋس. ال جەلدىڭ جىلدامدىعى سەكۋندىنا 7 م/س دەيىن جەتەدى. 

توتەنشە جاعدايلار مينيسترلىگىنىڭ قىزمەتكەرلەرى وزەرنوە، امانقاراعاي، كالينينو جانە لەسنوە اۋىلدارىنان 1841 ادامدى ءقاۋىپسىز جەرگە كوشىرگەن. جەرگىلىكتى اتقارۋشى ورگاندار ەۆاكۋاسيالانعانداردى اۋليەكول ورتا مەكتەبى مەن اۋليەكول مەكتەپ-ينتەرناتىنا ورنالاستىرعان. زارداپ شەككەندەرگە پسيحولوگيالىق كومەك كورسەتىلەتىن بولادى.

ءقازىر ەۆاكۋاسيالاۋ پۋنكتتەرىندە 66 ادام بار، قالعاندارى ۇيلەرىنە ورالدى نەمەسە تۋىستارىنىڭ ءۇيىن پانالاۋدا. قوستاناي وبلىسىنىڭ اكىمى ارحيمەد مۇحامبەتوۆ قوستاناي وبلىسىنىڭ اۋليەكول اۋدانىندا ورمان ورتىنەن زارداپ شەككەندەرگە جاڭا ۇيلەر سالۋعا جەر بولىنگەنىن مالىمدەدى. اكىم وبلىستا قىس وڭتۇستىككە قاراعاندا ەرتە تۇسەتىندىكتەن جاڭا ۇيلەر قازان ايىنا دەيىن سالىنىپ بىتۋگە ءتيىس ەكەنىن ايتتى.

ورتتەن 10 ادام اۋىر جانە جەڭىل جاراقاتتار الىپ، 1 ادام قازا تاپقان.

بۇگىن پرەزيدەنت قاسىم-جومارت توقايەۆ قوستاناي وبلىسىنا باردى.