قوستانايداعى ورتتەن ەلدىمەكەندەرگە ءقاۋىپ جوق دەپ حابارلادى توتەنشە جاعدايلار مينيسترلىگىنىڭ باسپا ءسوز قىزمەتى.
مينيسترلىك مالىمەتىنشە، ءقازىر جالىنداپ جانىپ جاتقان ۋچاسكەلەر جوق، قالدىق وت وشاقتارىن ءسوندىرۋ جۇمىستارى ءالى دە جالعاسىپ جاتىر. ءاربىر ەلدىمەكەندى (امانقاراعاي، لەسنوە، وزەرنوە جانە باعانالى اۋىلدارىنىڭ اۋماعىندا) قاراۋىلداۋ ۇيىمداستىرىلعان.
وبلىستاعى جاۋىن-شاشىننىڭ سەبەبىنەن اۋا ىلعالدىعى كۇشەيگەن.
"ساعات 7:30-دان 8.40-قا دەيىن ءورت اۋماعىنا ۇشۋ جۇمىستارى جۇرگىزىلدى. اۋەدەن بارلاۋ ناتيجەسىندە باعانالى اۋىلىنان قازانباسى اۋىلىنا قاراي اۋداندا ءورت تومەنگى بولىگىندە بايقالاتىنى كورىندى. وزەرنوە، لەسنوە جانە امانقاراعاي اۋىلدارىندا جاعداي تۇراقتالدى. وزەرنوە، امانقاراعاي اۋىلدارىندا تەك لوكالدى ءورت وشاقتارىنىڭ جانۋى، ءتۇتىن بايقالادى. كۇشتەر مەن قۇرالدار نەگىزگى جۇمىس جۇرگىزەتىن باعانالى اۋداندارىنا قايتا توپتاستىرىلدى. باعانالى، وزەرنوە، لەسنوە اۋىلدارىندا ەلدى مەكەندەرىندە جەردى جىرتۋ جۇمىستارىن جۇرگىزۋ ءۇشىن قورعانىس مينيسترلىگى مەن جەرگىلىكتى اتقارۋشى ورگانداردىڭ ينجەنەرلىك تەحنيكاسى دا جۇمىلدىرىلادى" دەلىنگەن حابارلامادا.
2 قىركۇيەكتە قوستاناي وبلىسىنىڭ اۋليەكول اۋدانىندا ورمان ورتەنىپ، جالىن وبلىستىڭ وزگە اۋداندارىن شارپىعان. قازىرگى ۋاقىتتا 5 ايماقتا ءورت ءسوندىرۋ جۇمىستارى ءالى جالعاسىپ جاتىر. ورتتەن 10 ادام اۋىر جانە جەڭىل جاراقات الىپ، 1 ادام قازا تاپقان.
پىكىر قالدىرۋ