رۋبلمەن نەمەسە تەڭگەدەن باسقا ۆاليۋتامەن تولەم قابىلداعان قازاقستاندىق ساتۋشىلار جازالاناتىن بولادى. بۇل تۋرالى ۇكىمەتتىڭ بۇگىنگى كۋلۋارىندا قارجى ءمينيسترى ەرۇلان جاماۋبايەۆ حابارلادى.
جۋرناليستەر مينيسترگە استاناداعى دۇكەندەردىڭ بىرىندە تاۋار باعاسى رۋبلمەن قويىلعانى تۋرالى اقپارات بار ەكەنىن ايتتى. مينيستر اتالعان وقيعانىڭ تىركەلمەگەنىن، ەگەر تىركەلسە باقىلاۋعا الىناتىنىن ەسكەرتتى.
"ءبىزدىڭ ۇلتتىق ۆاليۋتامىز – تەڭگە. باعا كورسەتكىشىنىڭ ءبارى ۇلتتىق ۆاليۋتامەن كورسەتىلۋى ءتيىس. ەگەر تاۋار باعاسى باسقا ۆاليۋتامەن كورسەتىلگەن بولسا، زاڭعا قايشى. ءبارىمىز زاڭعا باعىنۋىمىز كەرەك. ەگەر مۇنداي فاكتىلەر تىركەلگەن بولسا، زاڭسىز ارەكەتتەردىڭ الدىن الامىز. دۇكەن قىزمەتكەرلەرىنە دە ءتيىستى جازا قولدانىلادى"، دەدى مينيستر.
پىكىر قالدىرۋ