بەلگىلى كاسىپكەر، «سەنىمەن بولاشاق» رەسپۋبليكالىق قوعامدىق بىرلەستىگىنىڭ نەگىزىن قالاۋشى نۇركەن اسانوۆ قازىرگى قوعامداعى اتا-انا مەن بالا اراسىنداعى ەڭ وزەكتى ماسەلەلەردى كوتەردى. بۇل تۋرالى ول «راكۋرس» باعدارلاماسىندا ايتىپ، بارشا قازاقستاندىق اتا-اناعا ۇندەۋ جولدادى.
«سەنىمەن بولاشاق» رەسپۋبليكالىق اتا-انالار بىرلەستىگىنىڭ ميسسياسى سانالى اتا-انانىڭ قۇشاعىندا ساپالى ۇرپاق تاربيەلەۋ. قازاقستانداعى ءار اتا-انانىڭ جانايقايىن ەستىپ، كوپپەن بىرلەسە شەشۋ. بالانى نەگىزىنەن الدىمەن اتا-انا، سوسىن دوس-قۇربىسى، ۇستازى، ودان كەيىن قوعام تاربيەلەيدى. ال بۇگىندە بۇل تىزبەك كەرىسىنشە. الدىمەن قوعام تاربيەلەپ جاتىر. سوسىن بار جاۋاپكەرشىلىك پەن مىندەتتى ۇستازدىڭ موينىنا اسىپ قويعانبىز. بىرەۋ كىنالى بولسا ۇستاز كىنالى دەيمىز. ال كىنانى وزىمىزدەن ەش ىزدەمەيمىز. سولاي بالاعا اتا-انانىڭ تاربيەسى ەڭ سوڭعى ورىندا، نە مۇلدەم جوق. بۇگىندە بالانى ەمەس، سونداي اتا-انالاردىڭ وزدەرىن تاربيەلەۋ كەرەك» دەدى ول.
Cونىمەن قاتار نۇركەن اسانوۆ بۇگىنگى كۇننىڭ باستى مىندەتى بالا تاربيەسىمەن اينالىسۋ عانا ەمەس، قوعامنىڭ وي-ساناسىن وزگەرتىپ، ءبىر كۇندىك ەمەس مىڭجىلدىق بولاشاقتىڭ قامىن ويلاۋ كەرەكتىگى تۋرالى ايتىپ ءوتتى.
«مەنىكى وي ايتۋ ەمەس، وياتۋ! ءاربىر اتا-انانىڭ ساناسىن وياتۋ. سانالى اتا-انا بولۋعا ۇندەۋ. سانالى دەگەنىمىز – ءمىنسىز بولۋ دەگەن ءسوز ەمەس. ءمىن بارىندە بولادى. سانالى اتا-انا بولۋ دەگەن – جاۋاپكەرشىلىكتى سەزىنۋ. ۇلدى ساليقالى ۇرپاق وربىتۋگە، قىزدى ءورىسىڭدى كەڭەيتىپ سانالى ۇرپاقتى تاربيەلەۋگە ۇندەي ءبىلۋىمىز كەرەك. زامان وزىپ، مۇحيتتاردىڭ ءتۇبىن شارلاپ، عارىشقا ساپار شەكسەك تە، ۇلاعاتتى ۇرپاق ءوسىرۋ بار ءداۋىردىڭ باستى مىندەتى ەكەنىن ۇمىتپايىق» دەدى بەلگىلى كاسىپكەر.
پىكىر قالدىرۋ