باس پروكۋرور بەرىك اسىلوۆ "ديكيي ارمان" لاقاپ اتىمەن تانىمال كريمينال-اۆتوريتەت ارمان جۇماگەلدييەۆ قاڭتار وقيعاسىندا ۇقك كۋراتورىنىڭ باسشىلىعىمەن ارەكەت ەتكەنىن راستادى.
"ارمان جۇماگەلدييەۆ قالا ىشىندە تارتىپسىزدىك ورناتىپ، نارازىلىققا شىققانداردى باقىلاۋىنا العىسى كەلدى. سونداي-اق بيلىككە بىرنەشە ۋلتيماتۋمدىق تالاپتار قويۋ ءۇشىن "حالىق كەڭەسىن" قۇرۋدى جوسپارلادى. وعان الماتى قالاسى ءماسليحاتىنىڭ بۇرىنعى دەپۋتاتى (قايرات قۇدايبەرگەن - رەد) مەن الماتىداعى "قازاقستان" قوناقۇيىنە ۇيىمداسقان تۇردە كەلگەن بانديتتەردى قارۋلاندىرعان كريمينالدىق توپتىڭ مۇشەسى ماحاتوۆ بەلسەندى كومەكتەسكەن. الايدا ونىڭ جوسپارى جۇزەگە اسپادى. حالىق وعان باعىنبادى. ۇقك-نىڭ بۇرىنعى ءتوراعاسى ۇستالعانى تۋرالى اقپارات العاننان كەيىن، سەنىمدى اليبي جاساۋ ماقساتىندا مارودەرلەرگە قارسى كۇرەس دەگەن جەلەۋمەن قالا تۇرعىندارىنا شابۋىل جاساۋ تاپسىرىلدى"، دەدى بەرىك اسىلوۆ ماجىلىستە قاڭتار وقيعاسىن تەرگەۋ بارىسى تۋرالى بايانداماسىندا.
باس پروكۋروردىڭ مالىمەتىنشە، "ديكيي ارمان" ءوزىن كىناسىز ەتىپ كورسەتۋ ءۇشىن 6 قاڭتاردا قالانىڭ ءار جەرىنەن 24 ازاماتتى ۇرىپ، سوعىپ "Ritz Carlton" جانە "قازاقستان" قوناق ءۇيىنىڭ كولىك تۇراقتارىندا قاماۋدا ۇستاعان.
"كەيىن ۇستالعان ازاماتتاردى قالا شەتىندەگى كونتەينەرگە جەتكىزىپ، ۇقك قىزمەتكەرلەرىنىڭ قارۋلى كۇزەتىمەن قاماۋدا ۇستاعان. سودان سوڭ ولار اۋەجايعا جەتكىزىلدى. ۇستالعانداردىڭ ءبىرى وتەپبايەۆ ەسىمدى ازامات ازاپتاۋ مەن ۇرىپ-سوعۋ كەزىندە قازا تاپقان. ءقازىر اتالعان دەرەكتەر بويىنشا تەرگەۋ اياقتالدى"، دەدى باس پروكۋرور.
بەرىك اسىلوۆ كەلتىرگەن دەرەكتەردى وسىدان 3 اي بۇرىن ءقازىر قاماۋدا وتىرعان جۋرناليست ميحايل كوزاچكوۆ قولىنا تۇسكەن قۇجاتتار نەگىزىندە جاريالاعان بولاتىن. ول جۇماگەلدييەۆ ۇلتتىق قاۋىپسىزدىك كوميتەتى بەسىنشى دەپارتامەنتىنىڭ جەتەكشىسى رۋسلان ىسقاقوۆتىڭ باقىلاۋىمەن قىزمەتىن جۇزەگە اسىرعانىن ايتقان.
پىكىر قالدىرۋ