جۇڭگو اراعا 3 جىل سالىپ شەتەلدىكتەر ءۇشىن شەكاراسىن قايتا اشتى دەپ حابارلادى BBC. قىتايعا كەلۋشىلەر ەندى كارانتينگە جاتقىزىلمايدى، تەك 48 ساعات بۇرىن وتكەن پتر تەستتىڭ ناتيجەسىن كورسەتسە جەتكىلىكتى. 

سونداي-اق جەكسەنبى كۇنى جۇڭگو بيلىگى شەتەلدىكتەر ءۇشىن ارنايى ۆيزا بەرىپ، ەلدە بىرنەشە ۋاقىتقا قالۋعا مۇمكىندىك بەردى. ال جەرگىلىكتى تۇرعىندارعا قايتادان ءتولقۇجات الۋعا رۇقسات ەتتى. 

بۇدان بولەك، جۇڭگو مەن گونكونگ اراسىنداعى تەڭىز جانە قۇرلىق تاسىمالى قايتا جانداندى. دەگەنمەن، ساياحاتشىلار ساپارعا شىقپاس بۇرىن پتر تەست تاپسىرۋى كەرەك. 

جۇڭگو 2020 جىلدىڭ ناۋرىز ايىنىن بەرى  "نولدىك كوۆيد" ساياساتى اياسىندا شەكارانى جاۋىپ تاستاعان. قاراشا ايىنىڭ اياعىنداعى جاپپاي نارازىلىقتاردان كەيىن بەيجىڭ ءوزىنىڭ  كارانتينگە بايلانىستى كەيبىر شەكتەۋلەرىن جەڭىلدەتتى. الايدا "نولدىك كوۆيد" ساياساتىنان رەسمي تۇردە باس تارتپادى. 

قاتاڭ شەكتەۋلەردى الىپ تاستاعاننان كەيىن 3 جىل بويى وقشاۋلانعان حالىقتا ۇجىمدىق يممۋنيتەت قالىپتاسپاي، ۆيرۋس جۇقتىرعاندار سانى ارتا ءتۇستى. سوڭعى كەزدەرى ەلدەگى اۋرۋحانالار مەن كرەماتورييلەردە كەزەك كوپ ەكەنى تۋرالى اقپارات تارادى. ال جۇڭگو بيلىگى كوروناۆيرۋستان قازا تاپقانداردىڭ ستاتيستيكاسىن جاريالامايتىن بولعان. قىتايمەن كورشى ەلدەر شەكارا اشىلىسىمەن ەپيدەميانىڭ جاڭا تولقىنى باستالا ما دەپ قاۋىپتەنەدى.