وزبەكستاندا تۇرمىستىق زورلىق–زومبىلىق قىلمىستىق قۇقىق بۇزۋشىلىق ساناتىنا اۋىستىرىلىپ، پسيحولوگيالىق قىسىم جانە كامەلەتكە تولماعان بالالارعا كورسەتىلەتىن زورلىق–زومبىلىق ءۇشىن جازا زاڭ جۇزىندە كۇشەيتىلدى، دەپ جازادى uz.sputniknews.ru. 

"دەپۋتاتتار كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋدى كوزدەيتىن زاڭ قابىلداپ، سەناتقا جىبەردى"، دەپ حابارلايدى وليي ءماجىلىسى زاڭ شىعارۋ پالاتاسىنىڭ باسپا ءسوز قىزمەتى.

سوڭعى قابىلدانعان زاڭنامالارعا سايكەس ەندى ايەلدەر مەن بالالارعا فيزيكالىق، ەكونوميكالىق جانە پسيحيكالىق زورلىق–زومبىلىق جاساعاندار زاڭ الدىندا جاۋاپ بەرەدى. ال اليمەنت تولەۋدەن جالتارعاندار اقىلى قوعامدىق جۇمىستارعا سالىناتىن بولدى.

سونىمەن قاتار، ادامنىڭ جەكە ءومىرى مەن ار–نامىس، ءقادىر–قاسيەتىن قورلايتىن مالىمەتتەردى جاريا ەتكەندەر دە قىلمىستىق جاۋاپكەرشىلىككە تارتىلادى.

ەسكە سالا كەتەيىك، بىلتىر وزبەكستاندا توي ۇستىندە قالىڭدىققا قول كوتەرگەن كۇيەۋ جىگىتتىڭ ۆيدەوسى الەۋمەتتىك جەلىلەردە تاراپ، رەزونانس تۋدىرعان بولاتىن. كۇيەۋ جىگىتكە قاتاڭ جازا قولدانىلمادى. سودان بەرى وزبەك قوعامىندا ايەلدەرگە كورسەتىلەتىن زورلىق – زومبىلىققا بەي–جاي قارامايتىندار سانى ارتتى.