بۇگىن دۇنيەجۇزىلىك تەاتر كۇنى. بەلگىلى جازۋشى، دراماتۋرگ انتون چەحوۆ "تەاتر–توبىردان ۇلت قالىپتاستىراتىن جەر" دەپ تەاتر ونەرىن جوعارى باعالاسا، الەمنىڭ ءبىرىنشى ۇستازى اريستوتەل ءار قويىلىم ادامدى كاتارسيسكە ءتۇسىرۋى كەرەك دەپ ساناعان. وسى ورايدا Qamshy.kz اقپارات اگەنتتىگى تەاتر ونەرى تۋرالى قىزىقتى دەرەكتەردى نازارلارىڭىزعا ۇسىنادى.

♦ قازىرگى سەريالداردىڭ ءتۇپ تامىرى تەاتر قويىلىمدارىندا جاتىر. ەجەلگى سيسيليا ساحنالارىندا ءبىر جىلعا سوزىلاتىن قويىلىمدار قويىلاتىن بولعان. كورەرمەندەر كۇن سايىن قويىلىمنىڭ جالعاسىن كورۋ ءۇشىن تەاترعا جينالعان.

♦ ەجەلگى ريمدىكتەر قاندى كورىنىستى تاماشالاعاندى جاقسى كورگەنى سونشا، تەاترداعى قويىلىم بارىسىندا كەيىپكەر ولۋگە ءتيىس بولسا، اكتەردى ءولىم جازاسىنا كەسىلگەن قىلمىسكەرمەن الماستىرىپ، ساحنادا ولتىرە سالعان.

♦ العاشقى فونوگرامما ەجەلگى ريمدەگى تەاتر قويىلىمىندا قولدانىلعان. ءوز زامانىنداعى بەلگىلى دراماتۋرگ ليۆي اندرونيك تەك پەسا جازىپ قويماي، كەيىپكەرلەرىن ءوزى سومداۋدى دا ۇناتقان. بىردە تاماعى بىتەلىپ، داۋىسى شىقپاي قالعان ول ساحنا سىرتىندا ارنايى دايىندالعان بالانى كەرەك كەزىندە سويلەتىپ قويىپ، ءوزى تەك اۋزىن جىبىرلاتىپ تۇرعان.

♦ ەجەلگى يونيكالىقتار كورەرمەندەردىڭ قول شاپالاقتاپ، قوشەمەت كورسەتكەنىنە قاتتى كوڭىل بولگەن. قويىلىم كورۋگە ءبىر قولى عانا بار ادامدار كەلسە، ءبىر جەرگە جينالىپ، تاقىرباس قۇلداردىڭ باسىن قولمەن ۇرۋ ارقىلى قوشەمەت كورسەتەتىن بولعان.