بۇگىن قاڭتار وقيعاسىنا بايلانىستى ايىپتالىپ، ءۇيقاماقتا وتىرعان جانبولات مامايدىڭ ۇستىنەن قوزعالعان قىلمىستىق ءىس بويىنشا سوت ناتيجەسى شىقتى.

سوت جانبولات مامايدى 6 جىلعا شارتتى تۇردە سوتتاۋعا شەشىم شىعاردى. سونىمەن بىرگە، وعان 6 جىلعا دەيىن جۋرناليستىك، قوعامدىق–ساياسي قىزمەتپەن اينالىسۋعا دا تىيىم سالدى. 

ينگا يمانبايدىڭ مالىمدەۋىنشە، جانبولات ماماي ەشقانداي قىلمىس جاساماعانىنا ايعاق–دالەلدەر كەلتىرسە دە، ونى 6 جىلعا شارتتى تۇردە سوتتاۋ تۋرالى شەشىم قابىلدانعان.

"بۇل ساياسي استارى بار قۋدالاۋ ەكەنى ءسوزسىز. جانبولاتتىڭ ءوزى دە ونى سوتتا اشىق ايتتى. الداعى ۋاقىتتا اپەللياسيالىق شاعىم جولدايمىز. قازاقستاندا ادىلدىك تاپپايتىنىمىز انىق. دەمەك، حالىقارالىق ۇيىمداردىڭ كومەگىمەن بۇۇ دەڭگەيىندە شاعىم جازامىز"– دەپ حابارلادى ينگا يمانباي.

ۇكىم زاڭدى كۇشىنە ەنگەنشە بەلسەندى ءۇيقاماقتا بولادى.

ەسكە سالا كەتەيىك، جانبولات ماماي 2022 جىلعى اقپان ايىندا قاڭتار وقيعاسىنىڭ 40 كۇندىگىنە وراي وتكەن قارالى ميتينگتەن كەيىن ۇزاماي ۇستالىپ، قاراشاعا دەيىن تەرگەۋ يزولياتورىندا قاماۋدا وتىرعان. وعان و باستا جاپپاي تارتىپسىزدىك ۇيىمداستىردى، پوليسياعا ءتىل تيگىزدى، جالعان اقپارات تاراتتى دەگەن ايىپتار تاعىلعان. بىلتىر قازان ايىنىڭ سوڭىندا جاپپاي تارتىپسىزدىك ۇيىمداستىردى دەگەن ايىپ بەيبىت جيىن وتكىزۋ ءتارتىبىن بۇزدى دەگەن جەڭىلىرەك ايىپقا اۋىستىرىلعانى بەلگىلى بولدى. ال 2 قاراشا كۇنى سوت وعان قاتىستى بۇلتارتپاۋ شاراسىن وزگەرتىپ، تەرگەۋ يزولياتورىنان ءۇيقاماققا جىبەرگەن بولاتىن.