وڭتۇستىك كورەياداعى ينچحون اۋەجايىنان قاشىپ، بيىكتىگى 3،6 مەتر قورشاۋدان سەكىرىپ كەتكەن ەكى قازاقستاندىق سوتتالعالى جاتىر.

"وتانداستارىمىز وزگە ەلدىڭ زاڭناماسىن بۇزعاندىقتان، ولاردى قازاقستانعا دەپورتاسيالاۋ تۋرالى ءسوز قوزعاۋ مۇمكىن ەمەس. ەكى قازاقستاندىق قىلمىستىق كودەكستىڭ ءۇش بابى بويىنشا سوتتالادى"، – دەپ حابارلادى ق ر ءسىم رەسمي وكىلى ايبەك سمادياروۆ.

مينيسترلىكتىڭ مالىمەتىنشە، قازاقستاندىقتار وڭتۇستىك كورەيا زاڭناماسىنىڭ ءۇش بابىن بۇزدى دەپ ايىپتالىپ جاتىر. ولار :

♦ يمميگراسيالىق باقىلاۋ جانە ەلگە زاڭسىز كىرۋ تۋرالى زاڭ؛

♦ ەلدە زاڭسىز بولۋ؛

♦ اۋەجاي مەن ونىڭ وبەكتىلەرى تۋرالى زاڭنامانى بۇزىپ، ماتەريالدىق زالال كەلتىرۋ؛

"ءقازىر ەكى قازاقستاندىق تا ينچحوننىڭ كوشى–قون ورتالىعىنداعى تەرگەۋ يزولياتورىندا جاتىر. وڭتۇستىك كورەيا زاڭناماسىنا سايكەس تەرگەۋ شارالارى ءۇش ايعا  سوزىلۋى مۇمكىن، سودان كەيىن ءىس پروكۋراتۋراعا بەرىلەدى. وڭتۇستىك كورەيانىڭ قۇزىرلى ورگاندارى تەرگەۋ بارىسىندا ءىستىڭ ەگجەي–تەگجەيىن جاريالامايدى"، – دەدى ايبەك سمادياروۆ.

قازاقستاننىڭ وڭتۇستىك كورەياداعى ەلشىلىگى جەرگىلىكتى قۇقىق قورعاۋ ورگاندارىمەن جانە ۇستالعان ازاماتتاردىڭ تۋىستارىمەن تۇراقتى بايلانىس ورناتىپ وتىر.

"بىلىمسىزدىك جاۋاپكەرشىلىكتەن بوساتپايدى. ولار وڭتۇستىك كورەيا زاڭىن بۇزىپ، ورەسكەل قاتەلىك جاساعاندىقتان، ەلگە قايتارۋ مۇمكىن ەمەس. بۇل جاعدايدا داۋلاسۋىمىز ورىنسىز. وڭتۇستىك كورەيادا جۇمىس ىستەۋ ءۇشىن وزگە ەل ازاماتتارىنا ارنايى ۆيزا كەرەك. باسقا جولمەن جۇمىس جاساۋ زاڭسىز بولىپ تابىلادى" – دەپ حابارلادى ق ر ءسىم رەسمي وكىلى.

ەسكە سالا كەتەيىك، ناۋرىزدىڭ 24 كۇنى ەكى قازاقستاندىق وڭتۇستىك كورەياعا زاڭسىز كىرىپ، ينچحون اۋەجايىنداعى دەپورتاسيا ۇشاعىن كۇتۋ بولمەسىنەن قاشىپ كەتكەن بولاتىن. ولاردىڭ ءبىرى جەرگىلىكتى دۇكەننەن ۇستالسا، ەكىنشىسى بىرنەشە كۇننەن كەيىن ءوز ەركىمەن پوليسياعا بەرىلگەن ەدى.