بۇگىن بارشا مۇسىلمان مىڭ ايدان دا ءقادىرلى سانايتىن ءقادىر ءتۇنىن كۇتەدى. جاقىندا الماتى قالاسىنىڭ باس يمامى تولەبي وسپان رەداكسيامىزعا سۇحبات بەرىپ، ءقادىر ءتۇنىن قالاي وتكىزۋ كەرەگىن ايتقان بولاتىن.

"ءقادىر ءتۇنى – قاسيەتتى قۇران كارىم تۇسكەن ءتۇن. رامازاننىڭ سوڭعى ون كۇنىنىڭ تاق تۇندەرىندە ءقادىر ءتۇنىن كۇتەمىز. بۇل بيىل ءساۋىردىڭ 17–18 ارالىعىنا ءتۇسىپ تۇر. الايدا ءقادىر ءتۇنى رامازاننىڭ ون كۇنىنىڭ بىرىنە جاسىرىلعاندىقتان، مۇسىلمان ادام بارلىق تاق تۇندەرى ءۇمىت ەتىپ، ءقادىر ءتۇنىن كۇتەدى.  سول ءتۇندى ۇيقىمەن ەمەس قۇلشىلىقپەن وتكىزۋگە تىرىسادى. ءبىراق ءارتۇرلى جۇمىس جاسايتىن ادام بار. مۇسىلماننىڭ تۇندە جاساعان قۇلشىلىعى ەرتەسى كۇنى ءوزىنىڭ مىندەتتەلگەن جۇمىسىن ورىنداۋىنا، جۇمىسىن جاۋاپكەرشىلىكپەن اتقارۋىنا كەدەرگى كەلتىرىپ قويماۋى كەرەك. ءقادىر ءتۇنىن كۇتتىم ەكەن دەپ جۇمىسقا شىقپاي قويۋعا بولمايدى"– دەپ حابارلادى يمام.

سونىمەن قاتار، بۇل ءتۇنى اللا تاعالاعا جاقىنداۋ ماقساتىندا كوپتەپ قۇلشىلىق ەتۋ كەرەگىن ايتتى.

"بۇل ءتۇندى عالىمدارىمىز "اللا تاعالانىڭ مەيىرىم قاقپاسىن قاعۋ" دەپ تە اتايدى. مۇسىلماندار اللا تاعالانىڭ مەيىرىم قاقپاسى اشىلعانشا قاقپاسىن قاعىپ، مەشىتتە يتيكاف ەتىپ وتىرادى. ءبىراق بۇل اسىلىندا ەر كىسىلەرگە ارنالعان. ايەل ادام يتيكافتى ءوز ۇيىندە جاسالعانى ابزال. ايەل ادامنىڭ مەشىتى – ءوز بولمەسىندە"– دەدى تولەبي وسپان.