مۇنايشىلار نارازىلىق بىلدىرگەن سوڭ جاڭاوزەندىك مۇناي كومپانيالارىنا قاتىستى تەكسەرىس كوميسسياسى قۇرىلعان ەدى. ارنايى كوميسسيا ءبىرقاتار زاڭ بۇزۋشىلىقتار انىقتاعان. 

"وزەنمۇنايگاز" وسى ۋاقىتقا دەيىن جۇمىسقا كەلمەگەن قىزمەتكەرلەرگە جالاقى تولەپ كەلگەن. سونىڭ ءبىرى – بەلگىلى اقتاۋلىق ايتىسكەر. ول الدىمەن شتاتتا تەولوگ، كەيىن قوعاممەن بايلانىس جونىندەگى مامان قىزمەتىن اتقارعان. سونداي–اق، كەي قىزمەتكەر كەزەكتىڭ سوڭىندا تۇرعانىنا قاراماستان جۇمىسقا وزگەلەردەن ەرتە ورنالاسقان. ولاردىڭ اراسىندا بىلىكتىلىگى تومەن ماماندار دا بار.

"بەرىلگەن جالاقىنى تەكسەرۋ بارىسىندا ەڭبەك زاڭناماسىنىڭ بۇزىلعانى انىقتالدى. ۇستەمە جۇمىستارعا ەڭبەك كودەسىندە بەلگىلەنگەن مولشەردەن ارتىق اقشا تولەگەن. "وزەنمۇنايگاز" كومپانياسىندا ەڭبەك ءتارتىبىن بۇزۋ فاكتىلەرى بار. اتاپ ايتقاندا، اۋستافينگ ەكى ادام جۇمىستا ۇزاق ۋاقىت بولماعان. سوندا دا تولىقتاي اقشالارى تولەنگەن. وسىنداي زاڭبۇزۋشىلىقتاردى انىقتادىق، جۇمىس جالعاسىن تابادى"،– دەدى قازمۇنايگاز  ۇك باسقارما ءتوراعاسىنىڭ ورىنباسارى داۋلەتجان حاسانوۆ.

مەردىگەر مەكەمە قىزمەتكەرلەرىنە ارنايى كيىم مەن تاماق بەرمەگەن. زەينەتاقى جارنالارى 2–3 ايعا كەشىگىپ، جۇرگىزۋشىلەر كومبينەزون جانە تاماقپەن قامتاماسىز ەتىلمەگەن. كومپانيانىڭ جوبالىق قۇجاتتارى جوق، قاۋىپسىزدىك تالاپتارى بۇزىلعان، ەكولوگيالىق نورمالار ساقتالماعان. سونىمەن قاتار، جۇك كولىكتەرىنىڭ GPS دەرەكتەرى مەن ۋاقىت كەستەسى تولەنەتىن ايلىقتىڭ الدەقايدا جوعارى بولۋى كەرەگىن كورسەتتى.