قازاقستاندا 14 مىڭنان استام شەتەل ازاماتى جۇمىس ىستەيدى.  2023 جىلدىڭ 1 ساۋىرىندەگى ستاتيستيكا بويىنشا جەرگىلىكتى اتقارۋشى ورگانداردىڭ رۇقساتىمەن قازاقستاندا 14 417 شەتەل ازاماتى جۇمىس ىستەيدى، دەپ مالىمدەدى ەڭبەك جانە حالىقتى الەۋمەتتىك قورعاۋ مينيسترلىگى. 

شەتەلدىك جۇمىس كۇشىن تارتۋ بويىنشا باسشىلار مەن ولاردىڭ ورىنباسارلارىنا – 584، قۇرىلىمدىق بولىمشەلەردىڭ باسشىلىعىنا – 3028 ادام الۋعا رۇقسات بەرىلگەن. بۇلار الدىڭعى ساناتتاعى ماماندارعا جاتادى. الايدا ەلىمىزگە تارتىلعان جۇمىس كۇشىنىڭ نەگىزگى بولىگىن ءۇشىنشى جانە ءتورتىنشى ساناتتارى ماماندار قۇرايدى. ولاردىڭ جالپى سانى – 8067 ادام.  سونداي–اق ماۋسىمدىق جۇمىسقا 1302 ادام، كورپوراتيۆتىك اۋىسىم اياسىندا 1437 ادام جۇمىسقا الىنعان. قازاقستاندا جۇمىس ىستەيتىن شەتەلدىكتەر جۇڭگو، ءۇندىستان، تۇركيا، وزبەكستاننان كەلگەن.

ەلدەگى جالپى جۇمىس سانى بويىنشا ءقازىر قازاقستاندا 1693 جۇمىس بەرۋشى 407،9 مىڭنان استام قازاقستان ازاماتىن جۇمىسقا العان، بۇل جالپى قىزمەتكەرلەر سانىنىڭ 96 پايىزىن قۇرايدى.

ەسكە سالا كەتەيىك، ىشكى ەڭبەك نارىعىن قورعاۋ ماقساتىندا ەڭبەك مينيسترلىگى جىل سايىن شەتەلدىك مامانداردى تارتۋعا كۆوتا بولەدى. 2023 جىلى جالپى كۆوتا ەلدەگى جۇمىس كۇشىنىڭ 0،24 پايىزىن قۇراعان.