تالدىقورعانداعى سوت 28 ساۋىردە كۇدەبايەۆتى "قاڭتار وقيعاسى كەزىندە قىزمەتىن اسىرا پايدالاندى" دەپ 10 جىلعا سوتتادى. پروكۋراتۋرا كۇدەبايەۆتى قاڭتار وقيعاسى كەزىندە "قىزمەت ورنىن ادەيى تاستاپ كەتتى" دەپ ايىپتاعان. سونىمەن قاتار، كۇدەبايەۆ قۇقىق قورعاۋ ورگاندارى مەن مەملەكەتتىك مەكەمەلەردە جۇمىس ىستەۋ قۇقىعىنان 10 جىلعا ايىرىلدى.
سەرىك كۇدەبايەۆ قاڭتار وقيعاسى كەزىندە كومەندانت رەتىندە پوليسيا دەپارتامەنتىنىڭ عيماراتىنان كەتىپ، تارتىپسىزدىككە قاتىسۋشىلاردىڭ قارۋ ۇرلاۋىنا مۇمكىندىك بەردى دەپ ايىپتالعان بولاتىن.
ول سوت وتىرىسىنا كەلمەي قاشىپ كەتكەن ەدى. كەيىن كۇدەبايەۆتىڭ قىرعىزستانمەن شەكارانى كەسىپ ءوتىپ، بىشكەكتەن ىستامبۇلعا ۇشقانى بەلگىلى بولدى. سودان بەرى كۇدەبايەۆقا حالىقارالىق ىزدەۋ جاريالانعان.
كەشە باس پروكۋرور كۇدەبايەۆتىڭ ۇستالعانىن حابارلادى. بۇگىن كۇدەبايەۆتىڭ سوت وتىرىسى ءوتىپ، ول تاعىلعان ايىپتى مويىندامايتىنىن مالىمدەپ، سوتتاعى سوڭعى ءسوزىن ايتقان بولاتىن.
پىكىر قالدىرۋ