جەڭىس كۇنى قارساڭىندا سوعىس ارداگەرلەرىنە 4،6 ملرد تەڭگە سوماسىنا ءبىرجولعى ماتەريالدىق كومەك كورسەتىلەدى، دەپ مالىمدەدى ەڭبەك جانە حالىقتى الەۋمەتتىك قورعاۋ مينيسترلىگى. 

جەڭىس كۇنى قارساڭىندا جەرگىلىكتى اتقارۋشى ورگاندار 4،6 ملرد تەڭگە سوماسىندا ءبىرجولعى كومەك كورسەتۋدى كوزدەپ وتىر. ماتەريالدىق كومەكتىڭ ەڭ تومەنگى مولشەرى – 1،5 ملن تەڭگە، ال اقتوبە جانە پاۆلودار وبلىستارىندا 2 ملن تەڭگە. 

ەلىمىزدە ەكىنشى دۇنيەجۇزىلىك سوعىسقا قاتىسقان 222 ارداگەر، 60 106 – سوعىس مۇگەدەگى جانە جەڭىسكە ۇلەس قوسقان وزگە دە ازاماتتار تۇرادى. ولاردىڭ ىشىندە: قورشاۋداعى لەنينگراد تۇرعىندارى – 78 ادام؛ كامەلەتكە تولماعان كەزدە كونسلاگەردە بولعان – 175 ادام؛ قايتىس بولعان سوعىس مۇگەدەگىنىڭ جۇبايلارى – 2 413 ادام؛ سوعىستا قازا تاپقان جاۋىنگەرلەردىڭ جەسىرلەرى – 4 ادام؛ تىل ەڭبەككەرلەرى – 57 436 ادامدى قۇرايدى. 

2023 جىلعى 1 مامىرداعى ستاتيستيكا بويىنشا زەينەتاقىنى ەسكەرە وتىرىپ، اي سايىن بەرىلەتىن الەۋمەتتىك تولەمدەردىڭ ورتاشا جيىنتىق مولشەرى 150–230 مىڭنىڭ اراسىندا بولماق. 

بۇدان بولەك ارداگەرلەرگە تۇرعىن ءۇيدى جوندەۋ، وتىنمەن قامتاماسىز ەتۋ ، قوعامدىق كولىكتە جول ءجۇرۋ جەڭىلدىكتەرى، ءدارى– دارمەكپەن قامتاماسىز ەتۋ، ءتىس پروتەزدەۋ، ازىق– تۇلىكپەن قامتاماسىز ەتۋ سىندى قوسىمشا كومەك تۇرلەرى دە قاراستىرىلعان.