«قازاقستان استاناسىن تۇركىستانعا اۋىستىراتىن بولادى»
WhatsApp الەۋمەتتىك جەلىسىندە قازاقستان استاناسىن تۇركىستانعا كوشىرۋ تۋرالى بەينەروليك تارالىپ جاتىر. ۆيدەوروليكتە پرەزيدەنت قاسىم-جومارت توقايەۆ وسىنداي يدەيا ۇسىنىپ، ال پارلامەنت دەپۋتاتتارى ونى ءبىراۋىزدان قولداعانى كورسەتىلگەن. سونداي-اق ۆيدەوداعى اقپاراتتا استانانى اۋىستىرۋ رەسمي تۇردە 2024 جىلدىڭ قاڭتارىندا جاريالاناتىنى كورسەتىلگەن.
مۇنىڭ ءبارى جالعان. ق ر پرەزيدەنتىنىڭ رەسمي سايتىندا ەلوردانى تۇركىستانعا كوشىرۋ تۋرالى اقپارات جوق. سونداي-اق، پارلامەنتتىڭ سايتىندا استانانى كوشىرۋ تۋرالى ۆيدەودا كورسەتىلگەندەي "تاريحي شەشىم"، "قىزۋ تالقىلاۋ" جانە "ءبىراۋىزدان داۋىس بەرۋ" تۋرالى حابارلامالار جوق.
ەلوردانى استانادان تۇركىستانعا كوشىرۋ تۋرالى قاۋەسەت كوپتەن بەرى ايتىلىپ كەلەدى. الايدا، 2020 جىلى ق ر تۇڭعىش پرەزيدەنتى نۇرسۇلتان نازاربايەۆ مۇنداي اقپاراتتاردىڭ مۇلدەم نەگىزسىز ەكەنىن جانە مۇنداي شەشىم قابىلدانباعانىن ايتقان بولاتىن.
ەسكە سالساق، 2022 جىلى قازاقستان استاناسىن تۇركىستانعا ەمەس، قوستانايعا كوشىرۋ تۋرالى حابارلاما تاراعان ەدى. بۇل دا جالعان بولىپ شىقتى.
«جاڭاوزەننەن استاناعا كەلەتىندەر ءۇشىن ارنايىن ۆيزا اشتىرادى»
الەۋمەتتىك جەلىلەر مەن مەسسەندجەرلەردە ەلورداعا جاڭاوزەننەن جانە "باسقا دا نارازىلىق قالالارىنان" كەلگەن ادامدارعا ۆيزا الۋعا تۋرا كەلەتىنى تۋرالى حابارلاما تاراتىلادى. بۇل – جالعان اقپارات.
اتالعان حابارلامانى استانا قالاسىنىڭ اكىمدىگى جوققا شىعاردى.
"جەلىدە ەلوردادا قازاقستاننىڭ نارازىلىق بىلدىرگەن قالالارىنىڭ تۇرعىندارى ءۇشىن ۆيزالىق رەجيم ەنگىزىلەتىنى تۋرالى جالعان حابارلاما تاراتىلۋدا. استانا اكىمدىگى بۇل اقپاراتتىڭ شىندىققا جاناسپايتىنىن حابارلايدى. ەستەرىڭىزگە سالا كەتەيىك، جالعان مالىمەتتەردى تاراتۋ ق ر زاڭناماسىنا سايكەس جاۋاپكەرشىلىككە اكەلىپ سوعادى"، — دەلىنگەن استانا اكىمدىگىنىڭ حابارلاماسىندا.
سونداي-اق، تاراتىلاتىن حابارلامانىڭ كوزى Qaznews24 ساتيرالىق Instagram اككاۋنتى بولىپ تابىلاتىنىن اتاپ وتەمىز. پروفيلدەگى پاراقشادا ناقتى جاڭالىقتار ەمەس، ويدان شىعارىلعان جاڭالىقتار جاريالانادى دەلىنگەن.
«جاڭاوزەندە 2025 جىلعا دەيىن كارانتيندە بولادى»
الەۋمەتتىك جەلىلەر مەن مەسسەندجەرلەردە جاڭاوزەن قالاسى 2025 جىلعا دەيىن كارانتيندىك ايماق بولىپ جاريالانعانى تۋرالى اقپارات تاراتىلدى. بۇدان بىلاي ادامدارعا كىرۋ ءۇشىن ارنايى رۇقسات قاجەت بولادى. بۇل دا جالعان حابارلاما ەكەنى بەلگىلى بولدى.
بۇل جازبانىڭ دەرەككوزى – Qaznews24 ساتيرالىق Instagram اككاۋنتى. بۇل پاراقشادا تەك ويدان شىعارىلعان جاڭالىقتار جاريالانادى. شىنايى حابارلامالار جوق.
ماڭعىستاۋ وبلىسى اكىمدىگىنىڭ رەسمي سايتىندا جاڭاوزەن اۋماعىندا كارانتيندىك شەكتەۋلەر ەنگىزۋ تۋرالى اقپارات جوق. جەرگىلىكتى بۇقارالىق اقپارات قۇرالدارىندا دا بۇعان قاتىستى رەسمي اقپارات جاريالانباعان. سول سەبەپتى مۇنداي اقپاراتتاردىڭ نەگىزسىز ەكەنىن، سەنۋگە بولمايتىنىن حابارلايمىز.
WhatsApp-تا 26 ساۋىردەن 10 مامىرعا دەيىن قازاقستاندىقتار ينتەرنەتكە كىرۋدەن ايىرىلاتىنى تۋرالى حابارلاما تاراتىلادى. بۇل – جالعان اقپارات.
ينتەرنەت جەلىسىن اجىراتۋ تۋرالى حابار پاۆلودار وبلىسىندا پايدا بولدى. سودان كەيىن ول ۆيرۋستىق سيپاتقا يە بولىپ، الەۋمەتتىك جەلىگە تاراپ كەتتى. ءوڭىردى سيفرلاندىرۋ باسقارماسىندا اتالعان اقپارات تەرىسكە شىعارىلدى.
"بۇل اقپارات شىندىققا جاناسپايدى. 2023 جىلعى 24 ساۋىردەگى جاعداي بويىنشا بارلىق بايلانىس وپەراتورلارىنىڭ اقپاراتتىق-تەلەكوممۋنيكاسيالىق ينفراقۇرىلىمى شتاتتىق رەجيمدە جۇمىس ىستەيدى. سىزدەن سەنىمدى كوزدەردەن الىنعان اقپاراتقا سەنۋىڭىزدى جانە فەيكتەردى تاراتپاۋىڭىزدى سۇرايمىز"، - دەلىنگەن حابارلامادا.
بۇدان شىعاتىنى، تاراتىلاتىن حابارلاماعا سەنۋدىڭ قاجەتى جوق. قازاقستاندا 26 ساۋىردەن 10 مامىرعا دەيىن ينتەرنەت جەلىسىن وشىرىلمەيدى.
پىكىر قالدىرۋ