ەكولوگتاردىڭ تەكسەرىسىنەن كەيىن «ارسەلورميتتال تەمىرتاۋعا» اۋانى لاستاعانى ءۇشىن 1 ملرد تەڭگەدەن استام ايىپپۇل سالىندى، دەپ حابارلادى قاراعاندى وبلىسىنىڭ ەكولوگيا دەپارتامەنتى.
2022 جىلدىڭ 5 قىركۇيەگى مەن 3 قازانى ارالىعىندا "ارسەلورميتتال تەمىرتاۋ" اق–عا جوسپاردان تىس تەكسەرۋ جۇرگىزىلگەن. تەكسەرۋ بارىسىندا ونەركاسىپ ورنىندا قازاقستان رەسپۋبليكاسىنىڭ ەكولوگيالىق زاڭناماسى ورەسكەل بۇزىلعانى انىقتالدى.
"نەگىزگى زاڭ بۇزۋشىلىق – كوكس، جەو 2، اگلومەراسيا، دومنا، №2، №3 مەتالل يلەۋ جانە اك كۇيدىرۋ سەحتارىندا شىعارىندىلاردىڭ رۇقسات ەتىلگەن نورمادان اسىپ كەتۋى بولدى. دەپارتامەنت ەكولوگيالىق زاڭنامانى بۇزعانى ءۇشىن 1 207 287 661 تەڭگە اكىمشىلىك ايىپپۇل سالدى"، - دەپ حابارلادى ۆەدومستۆو.
تەمىرتاۋ قالاسى اكىمشىلىك سوتىنىڭ شەشىمىنە سايكەس، 2023 جىلدىڭ 15 تامىزىنا دەيىن "ارسەلورميتتال تەمىرتاۋ" اق ايىپپۇلدى ءۇش كەزەڭمەن ءبولىپ تولەۋى ءتيىس.
ەسكە سالا كەتەيىك، "ارسەلورميتتال تەمىرتاۋعا" بۇعان دەيىن دە 1،2 ملرد تەڭگە ايىپپۇل سالىنعان بولاتىن.
پىكىر قالدىرۋ