رەسەيلىك ءانشى گريگوريي لەپستىڭ ديرەكتورى ۆلاديمير ۋريۋپين ءانشىنىڭ قونايەۆتاعى كونسەرتى توقتاتىلعاننان كەيىن قازاقستان تۋرالى پىكىرىمەن ءبولىستى.

"قازاقستان–ناعىز رۋسوفوبيالىق ەل. ءبىراق ودان گريگوريي ۆيكتوروۆيچتىڭ ۇستانىمى وزگەرمەيدى. وزگە ەلدەر نە دەسە دە، ءبىز ءوز ەلىمىزدى قولدايمىز. كونسەرتتى توقتاتا بەرسىن. قازاقستانسىز دا تىرلىگىمىزدى جاساي بەرەمىز. ءبىز ءوز ەلىمىزدى قولدايمىز جانە جەڭىس بىزدىكى بولۋ ءۇشىن قولىمىزدان كەلگەننىڭ ءبارىن جاسايمىز. بۇل وقيعا قازاقستاندىقتار ەسىنەن اداسىپ جاتقانىنىن تاعى ءبىر كورىنىسى بولدى"، – دەدى ۋريۋپين گازەتا.Ru باسىلىمىنا.

سونىمەن قاتار، ول لەپستىڭ ەندى قازاقستانعا بارمايتىنىن ايتتى.

"ءبىزدى ىستىق پەيىلمەن كۇتپەيتىن ەلدەرگە بارمايمىز، بۇل اقش قا بارعانمەن بىردەي. دۇشپاندار بىزگە نە ىستەسە، ءبىز دە ولارعا سونى ىستەيمىز"، – دەدى ول.

ەسكە سالايىق، لەپس 8 شىلدەدە قونايەۆ قالاسىندا كونسەرت قويۋدى جوسپارلاعان بولاتىن. بيلەت باعاسى 50 مىڭ تەڭگەدەن باستالىپ، 1 ميلليون تەڭگەگە دەيىن باعالانعان. 

بۇعان دەيىن رەسەي انشىلەرى نيكولاي باسكوۆ پەن گريگوريي لەپس ۋكراين تانكتەرىن جويعاندارعا ءبىر ميلليون رۋبلدەن تولەۋگە دايىن ەكەنىن مالىمدەگەن. سوندىقتان قازاقستاندىقتار سوعىستى قولدايتىن ءارتىستىڭ ەلىمىزدە ونەر كورسەتۋىنە  نارازىلىق ءبىلدىردى.

كوپ ۇزاماي گريگوريي لەپستىڭ كونسەرتى وتپەيتىنى بەلگىلى بولدى.