قاڭتار وقيعاسى كەزىندە سەمەي قالاسىنىڭ پوليسياسىندا ازاپتالىپ ولتىرىلگەن جاندوس جوتابايەۆتىڭ ءىسى بويىنشا ايىپتالعان ۋاقىتشا قاماۋ يزولياتورىنىڭ فەلدشەرى گۇلميرا تولەۋبەكوۆا ءبىر جىلعا شارتتى تۇردە سوتتالدى. بۇل جونىندە "ۆلاست" باسىلىمى حابارلادى.
سوت تولەۋبەكوۆانى ءۇش جىل مەديسينا مەكەمەلەرىندە جۇمىس ىستەۋ قۇقىعىنان ايىرىپ، مورالدىق وتەماقى رەتىندە جوتابايەۆتىڭ وتباسىنا 500 مىڭ تەڭگە تولەۋ مىندەتتەدى. سونىمەن قاتار، جابىرلەنۋشىلەر وتەماقى قورىنان 30 630 تەڭگە وندىرەدى.
گۇلميرا تولەۋبەكوۆاعا "كەزدەيسوق ءبىر ادامنىڭ ولىمىنە اكەلگەن مەديسينا قىزمەتكەرىنىڭ كاسىبي مىندەتىن ءتيىستى دارەجەدە ورىنداماۋ" بابى بويىنشا ايىپ تاعىلعان. ال فەلدشەردى قورعاۋشىلار تارابى ونىڭ جوتابايەۆ ولىمىنە قاتىسى جوق دەپ حابارلاپ، بۇل ءىس بويىنشا ءبىرىنشى كەزەكتە ونى ازاپتاعان پوليسيا قىزمەتكەرلەرى مەن ۋاقىتشا قاماۋ يزولياتورىن جاۋاپقا تارتۋ قاجەتتىگىن ايتقان.
بۇعان دەيىن جوتابايەۆتىڭ ولىمىنە بايلانىستى "قاتىگەز، ادامگەرشىلىككە جاتپايتىن نەمەسە قادىر-قاسيەتتى قورلايتىن قارىم-قاتىناس، ازاپتاۋلار" بابى بويىنشا پوليسيا قىزمەتكەرلەرى الىشەر قاناقىنوۆ پەن ەرسۇلتان اعزانوۆقا ايىپ تاعىلعان. ولاردىڭ سوت پروسەسسى ەندى عانا باستالدى.
ەسكە سالا كەتەيىك، جاندوس جوتابايەۆ بىلتىر 6 قاڭتاردا "بەيبىت ميتينگكە قاتىسقانى ءۇشىن" ۇستالعان. ول پوليسيا بولىمشەسىندە ەكى كۇن قاماۋدا بولىپ، كەيىن ۋاقىتشا قاماۋ يزولياتورىنا اۋىستىرىلعان. 17 قاڭتاردا يزولياتور قىزمەتكەرلەرى جەدەل جاردەم شاقىرىپ، جوتابايەۆتىڭ قايتىس بولعانىن حابارلاعان. جاندوس جوتابايەۆتىڭ باۋىرى 2022 جىلى اقپاندا زەرتتەۋ كەزىندە مارقۇمنىڭ وكپەسىنەن سۇيىقتىق تابىلعانىن، مۇنداي جاعداي قاتتى سوققىعا جىعىلعان ادامدا بولاتىنىن ايتقان. باۋىرىنىڭ ايتۋىنشا، ونىڭ 11 قابىرعاسى سىنعان.
پىكىر قالدىرۋ