پارلامەنت سەناتى "قازاقستان رەسپۋبليكاسىنىڭ كەيبىر زاڭنامالىق اكتىلەرىنە جول ءجۇرىسىن ۇيىمداستىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭدى ماقۇلدادى. جاڭا زاڭناماعا سايكەس ەندى 18 جاستان اسقان ازاماتتار عانا ساموكات ايداي الادى.
سەناتور ەۆگەنيي بولگەرتتىڭ ايتۋىنشا، زاڭ بويىنشا "ەلەكتروندىق ساموكات" ۇعىمى ەنگىزىلەدى.
"ول ەڭ جوعارى كونسترۋكتيۆتىك جىلدامدىعى ساعاتىنا 25 كيلومەتردەن اسپايتىن كولىك قۇرالى دەپ تانىلادى جانە ولاردىڭ قوزعالىسى ءۇشىن ورىندار ايقىندالادى. سونداي-اق ساموكات جۇرگىزۋشىلەرى ءۇشىن ءبىرقاتار تىيىم ەنگىزىلەدى. اتاپ ايتقاندا، زاڭمەن ەنگىزىلگەن شارتتار مەن تىيىمداردى ساقتاي وتىرىپ، ەلەكتر ساموكاتتارعا جولدىڭ ءجۇرىس بولىگىنىڭ وڭ جاق شەتى بويىنشا جۇرۋگە جول بەرىلەدى"، - دەدى سەنات دەپۋتاتى.
ساموكات جۇرگىزۋشىسى 18 جاسقا تولعان بولۋى شارت، سونىمەن قاتار كەز كەلگەن ساناتتاعى كولىكتى باسقارۋ قۇقىعىن بەرەتىن جۇرگىزۋشى كۋالىگى، تۇيمەلەنگەن دۋلىعا، ال تاۋلىكتىڭ قاراڭعى ۋاقىتىندا ۇستىندە جارىق شاعىلىستىراتىن زات بولۋعا ءتيىس.
زاڭدا شاعىن ەلەكتر كولىگى مەن ەلەكتروساموكات جۇرگىزۋشىلەرىنىڭ قۇقىقتارى مەن مىندەتتەرى بەلگىلەنگەن.
بۇدان بولەك، باسقا قۇزىرەتتى ورگاندا تىركەلگەن كولىكتەردىڭ "جول قوزعالىسى تۋرالى" زاڭدا كوزدەلگەن تالاپتارعا سايكەستىگىن تەكسەرۋ ءۇشىن ىشكى ىستەر ورگاندارى قىزمەتكەرلەرىنىڭ كولىكتەردى توقتاتۋىنىڭ نەگىزدەرىن بەلگىلەيتىن تۇزەتۋلەر ەنگىزىلدى.
كولىكتەردى مەملەكەتتىك تىركەۋ تۋرالى كۋالىكتەردى، جۇرگىزۋشى كۋالىكتەرىن جانە مەملەكەتتىك تىركەۋ نومىرلىك بەلگىلەرىن دايىنداۋ سالاسىندا مەملەكەتتىك مونوپوليا ەنگىزىلمەك. بۇل قىزمەت تۇرلەرىن جۇزەگە اسىرۋ قۇقىعى ق ر ءىىم جانىنداعى شارۋاشىلىق جۇرگىزۋ قۇقىعىنداعى رەسپۋبليكالىق مەملەكەتتىك كاسىپورىنىنا بەرىلەدى.
"رۇقساتتار جانە حابارلامالار تۋرالى" زاڭى كولىك جۇرگىزۋشىلەرىن دايارلاۋ جونىندەگى وقۋ ۇيىمدارىنىڭ قىزمەتىن باستاۋ نەمەسە توقتاتۋ تۋرالى حابارلامانىڭ جاڭا تۇرىمەن تولىقتىرىلادى.
"ءماجىلىس قابىلداعان زاڭ جەكە ءجۇرىپ-تۇرۋ قۇرالدارىن پايدالانۋ ءتارتىبىن قۇقىقتىق رەتتەۋ سالاسىنداعى العاشقى قادام. سونىمەن قاتار، ەنگىزىلەتىن قۇقىقتىق نوۆەللالاردى تاجىريبەدە سىناقتان وتكىزۋدى، سونداي-اق ەلەكتر ساموكاتتار مەن شاعىن ەلەكتر كولىكتەرىن پايدالانۋ ءتارتىبىن رەتتەۋدىڭ حالىقارالىق تاجىريبەسىن ەسكەرە وتىرىپ، بولاشاقتا ءوزىنىڭ زاڭنامالىق شەشىمىن تالاپ ەتەتىن ءبىرقاتار ماسەلە بار"، - دەدى بولگەرت.
سەنات ءماجىلىس قابىلداعان زاڭدى ماقۇلداپ، پرەزيدەنتتىڭ قول قويۋىنا جىبەردى.
پىكىر قالدىرۋ