اقمولا وبلىسىنىڭ ءبىلىم بەرۋ بۋحگالتەرلەرى اسا ءىرى مولشەردە اقشا ۇرلادى دەگەن كۇدىككە ءىلىندى، دەپ حابارلايدى باس پروكۋراتۋرا.
بۇلاندى بالاباقشاسىنىڭ بۋحگالتەرى كاسىپكەرلەرمەن ويدان شىعارىلعان مامىلەلەر جاساپ، تۋىستارىنىڭ شوتتارىنا اقشا اۋدارعان. ال اۋدارىمداردىڭ شىنايىلىعىن كورسەتۋ ءۇشىن تاۋارلاردى جەتكىزۋگە كەلىسىم-شارتتار جاسالعان كاسىپورىنداردىڭ اتاۋلارىن كورسەتكەن. ءبىراق بانكتىك شوتتار جاقىن تۋىستارىنا اشىلعان. وسىلايشا، بالاباقشا ەسەپشىسى 47 ميلليون تەڭگەنى جىمقىردى.
ال ستەپنوگورسك قالاسى مەكتەپتەرىنىڭ بىرىندە بۋحگالتەر ءوز شوتىنا 36 ميلليون تەڭگەنى جالاقى رەتىندە اۋدارعان.
قازىرگى كەزدە وسى فاكتىلەر بويىنشا قىلمىستىق كودەكستىڭ 189-بابى، 2-تارماعىنىڭ 4-بولىگى (اسا ءىرى مولشەردە ۇرلاۋ) بويىنشا سوتقا دەيىنگى تەرگەۋ شارالارى باستالدى. بۇلباپتا بەلگىلى ءبىر لاۋازىمداردى اتقارۋعا نەمەسە بەلگىلى ءبىر قىزمەتپەن اينالىسۋعا تىيىم سالا وتىرىپ، 12 جىلعا دەيىن باس بوستاندىعىنان ايىرۋ جازاسى قاراستىرىلعان.
پىكىر قالدىرۋ